کے۔الیکٹرک (KE) نے پاکستان میں پہلا ریٹیل لسٹڈ قلیل مدتی اسلامی ریٹیل سکوک متعارف کروا کر ملکی کارپوریٹ سکوک مارکیٹ میں نئی جہت کا آغاز کر دیا ہے۔ اس سکوک کا قبل از آئی پی او مرحلہ، جس کی مالیت ایک ارب روپے ہے، کامیابی سے مکمل کیا جا چکا ہے۔ یہ مرحلہ خاص طور پر صنعتی و بڑے کمرشل صارفین اور ہائی نیٹ ورتھ افراد کے لیے ترتیب دیا گیا تھا۔
اب یہ آئی پی او 4 اگست سے مرحلہ وار عوام کے لیے کھولا جا رہا ہے، جس میں پاکستان بھر سے سرمایہ کار حصہ لے سکتے ہیں، بشمول کے۔الیکٹرک کے رہائشی اور کمرشل صارفین۔ فی الوقت آئی پی او بلیک آؤٹ مرحلے میں ہے، جس کے دوران صرف انفرادی سرمایہ کار شرکت کر سکتے ہیں۔ 18 اگست 2025 کے بعد یہ آئی پی او تمام سرمایہ کاروں کے لیے دستیاب ہوگا، جن میں ایسیٹ مینجمنٹ کمپنیاں بھی شامل ہیں۔
یہ جدید مالیاتی پراڈکٹ پاکستان کے کارپوریٹ سکوک منظرنامے میں سنگِ میل کی حیثیت رکھتی ہے اور یہ سیکورٹیز اینڈ ایکسچینج کمیشن آف پاکستان (SECP) اور پاکستان اسٹاک ایکسچینج (PSX) کے اس وژن کے عین مطابق ہے جس کا مقصد سیکنڈری کیپیٹل مارکیٹ کو فروغ دینا ہے۔
نادہندگان کی سزا بل بھرنے والوں کو کیوں؟ نیپرا نے کے الیکٹرک کو شوکاز نوٹس بھیج دیا
کے۔الیکٹرک کے چیف فنانشل آفیسر محمد عامر غازیانی نے اس موقع پر کہا:
’کے۔الیکٹرک کارپوریٹ اجرا کنندہ کے طور پر سکوک اجراء میں ہمیشہ پیش پیش رہا ہے۔ 2014 میں کمپنی نے کامیابی سے 6 ارب روپے کے ”کے۔ای عزم سرٹیفکیٹس“ جاری کیے، جو ریٹیڈ، لسٹڈ اور محفوظ شرکت الملک سکوک تھے۔ 2020 میں، کے۔الیکٹرک نے 25 ارب روپے کا سب سے بڑا طویل مدتی لسٹڈ سکوک جاری کیا۔ جنوری 2022 سے اب تک کمپنی 33 شارٹ ٹرم پرائیویٹلی پلیسڈ شرکت العقد سکوک جاری کر چکی ہے تاکہ ورکنگ کیپیٹل کی ضروریات کو پورا کیا جا سکے۔ اب یہ نیا ریٹیل سکوک ہماری مالیاتی جدت اور کیپیٹل مارکیٹ میں شمولیت کا ایک اور ثبوت ہے۔‘
انہوں نے بتایا کہ کے۔الیکٹرک کے ریٹیل سکوک کی ساخت اور شریعہ مطابقت کی منظوری تین علیحدہ شریعہ بورڈز سے حاصل کی گئی ہے، جن میں ایچ بی ایل شریعہ بورڈ، اساس شریعہ ایڈوائزری سروسز اور مفتی علی اصغر شامل ہیں۔ ان شریعہ مشیروں نے اس بات کی تصدیق کی کہ یہ سکوک اسلامی اصولوں کے مطابق ہے، جو کے۔الیکٹرک کی اخلاقی اور سود سے پاک مالیاتی حل پیش کرنے کی پالیسی کا مظہر ہے۔
عامر غازیانی نے مزید کہا، ’کے۔الیکٹرک کا ریٹیل سکوک ان افراد کے لیے پرکشش سرمایہ کاری کا موقع فراہم کرتا ہے جو ڈیٹ کیپیٹل مارکیٹس میں زیادہ منافع اور ٹیکس فوائد حاصل کرنا چاہتے ہیں۔ اس سکوک میں ایک منفرد خصوصیت بھی شامل ہے جس کے تحت رہائشی اور کمرشل صارفین اپنے ماہانہ سکوک منافع کو بجلی کے بل میں ایڈجسٹ کر سکتے ہیں۔ شرکت العقد اسلامی اسٹرکچر کے ذریعے اس سکوک کے سرمایہ کار کے۔الیکٹرک کے بنیادی کاروباری عمل میں براہ راست شریک ہو سکیں گے۔‘
کے الیکٹرک کیلئے 7 سالہ نیا ٹیرف منظور، کراچی والوں کے بلوں پر کیا اثر پڑے گا؟
انہوں نے کہا کہ کے۔الیکٹرک مالیاتی جدت اور پاکستان کی کیپیٹل مارکیٹ کو مضبوط بنانے کے لیے پرعزم ہے اور کراچی کے بجلی کے انفراسٹرکچر میں مسلسل سرمایہ کاری جاری رکھے ہوئے ہے۔ سرمایہ کاروں کو منافع ان کے بینک اکاؤنٹس میں منتقل کیا جائے گا، جب تک وہ منافع ایڈجسٹمنٹ کا آپشن نہ منتخب کریں – جس کا عمل نہایت آسان اور سہل رکھا گیا ہے۔
اعداد و شمار کے مطابق پاکستان میں کارپوریٹ سکوک مارکیٹ میں زیادہ تر اجرا پرائیویٹ پلیسمنٹ کے ذریعے کیے جاتے ہیں۔ اب تک مجموعی طور پر صرف 153 ارب روپے کے کارپوریٹ سکوک جاری ہوئے ہیں، جو کل مارکیٹ کا محض 9 فیصد بنتے ہیں۔ اس کے مقابلے میں حکومتی سکوک کی مالیت 1,700 ارب روپے ہے، جو 91 فیصد مارکیٹ پر محیط ہے۔ کے۔الیکٹرک کے اس ریٹیل سکوک کا اجرا ڈیٹ کیپیٹل مارکیٹس میں وسیع تر شمولیت کو فروغ دینے اور سرمایہ کاروں کو ایک نئی راہ فراہم کرنے کی ایک اہم کاوش ہے۔