الخدمت فاؤنڈیشن پاکستان کی جانب سے فلسطینی عوام کے ساتھ اظہارِ یکجہتی اور عملی امداد کا سلسلہ جاری ہے۔ غزہ میں خوراک اور ادویات کے شدید بحران سے نبرد آزما مظلوم فلسطینی خاندانوں کے لیے 100 ٹن امدادی سامان کی 28ویں کھیپ اسلام آباد سے روانہ کر دی گئی۔
یہ امدادی سامان خصوصی کارگو طیارے کے ذریعے روانہ کیا گیا، جو اردن کے دارالحکومت عمان پہنچے گا اور وہاں سے غزہ کے متاثرہ علاقوں میں تقسیم کیا جائے گا۔ امدادی کھیپ کی روانگی کے موقع پر نائب وزیراعظم اسحاق ڈار، صدر الخدمت ڈاکٹر حفیظ الرحمن، اور این ڈی ایم اے کے حکام موجود تھے۔
اس موقع پر نائب وزیراعظم اسحاق ڈار نے الخدمت فاؤنڈیشن کی خدمات کو سراہتے ہوئے کہا کہ پاکستان، فلسطینی عوام کی ہر ممکن مدد جاری رکھے گا۔ انہوں نے الخدمت کے رضاکاروں کو خراجِ تحسین پیش کیا جو نہایت مشکل حالات میں غزہ کے مظلوموں کی مدد کر رہے ہیں۔
صدر الخدمت ڈاکٹر حفیظ الرحمٰن نے بتایا کہ اس تازہ ترین کھیپ میں 65 ٹن کین فوڈ، بچوں کے لیے 20 ٹن خشک دودھ، 5 ٹن بسکٹ اور 10 ٹن ادویات شامل ہیں۔ انہوں نے کہا کہ الخدمت فاؤنڈیشن گزشتہ 22 ماہ سے مسلسل غزہ کے مظلوم عوام کی امداد کر رہی ہے اور اب تک ہزاروں ٹن امدادی سامان متاثرین تک پہنچایا جا چکا ہے۔
ڈاکٹر حفیظ الرحمن نے مزید بتایا کہ الخدمت نے 24 فضائی اور 4 بحری امدادی کھیپیں روانہ کی ہیں، جب کہ قاہرہ، اردن اور لبنان میں الخدمت کے کیمپ آفسز سے مسلسل ریلیف آپریشن جاری ہے۔ غزہ کے اندر صاف پانی، تیار کھانا، خیمے اور ادویات سمیت دیگر امداد متاثرین تک پہنچائی جا رہی ہے۔
انہوں نے اعلان کیا کہ اگلے مرحلے میں الخدمت غزہ کے ان طلبہ اور مریضوں کو پاکستان لائے گی جنہیں تعلیم یا علاج کی فوری ضرورت ہے، خصوصاً وہ فلسطینی جو کینسر جیسے مہلک امراض میں مبتلا ہیں۔ ان مریضوں کی رہائش، علاج اور دیگر ضروریات کا مکمل بندوبست الخدمت فاؤنڈیشن کرے گی۔