بابوسرٹاپ میں حالیہ کلاؤڈ برسٹ کے باعث شدید جانی و مالی نقصان ہوا ہے۔ گلگت بلتستان حکومت نے اس افسوسناک صورتحال پر وزیراعظم شہباز شریف کو تفصیلی بریفنگ دی۔ وزیراعظم نے گلگت بلتستان کا ایک روزہ دورہ کیا اور بارشوں و سیلاب سے متاثرہ علاقوں کی صورتحال کا جائزہ لیا۔
وزیرِاعظم شہباز شریف نے حالیہ مون سون بارشوں اور سیلابی صورتحال کے بعد گلگت بلتستان کا ایک روزہ دورہ کیا، جہاں اُن کی زیر صدارت ایک اعلیٰ سطح جائزہ اجلاس منعقد ہوا۔ اجلاس میں متاثرہ علاقوں میں جانی و مالی نقصانات، جاری امدادی سرگرمیوں اور آئندہ لائحہ عمل کا تفصیلی جائزہ لیا گیا۔
وزیراعلیٰ گلگت بلتستان گلبر خان نے اجلاس میں بتایا کہ کہا کہ حالیہ بارشوں اور سیلاب سے خطے میں شدید نقصان ہوا ہے۔ انہوں نے زور دیا کہ سیاحت کے فروغ کے لیے انفرااسٹرکچر کی تعمیر ناگزیر ہے۔ گلبر خان نے کہا کہ وزیراعظم گلگت بلتستان کے عوام کے مسائل کو بخوبی سمجھتے ہیں۔
وزیراعظم شہباز شریف نے اجلاس سے خطاب کرتے ہوئے کہا کہ پاکستان ماحولیاتی تبدیلیوں سے متاثرہ دنیا کے دس بڑے ممالک میں شامل ہے۔ ہر سال موسمیاتی تبدیلیوں کے باعث ملک کو نقصانات کا سامنا کرنا پڑتا ہے۔
وزیرِاعظم نے کہا کہ ”حالیہ مون سون میں گلگت بلتستان سمیت ملک کے مختلف حصوں میں ہونے والے نقصانات پر میں اور پوری قوم افسردہ ہیں۔“ انہوں نے واضح کیا کہ پاکستان کا دنیا میں موسمیاتی تبدیلیوں میں حصہ نہ ہونے کے برابر ہے، مگر اثرات کی شدت سب سے زیادہ پاکستان کو جھیلنی پڑ رہی ہے۔
انہوں نے وفاقی اداروں کو ہدایت کی کہ وہ گلگت بلتستان حکومت کے ساتھ قریبی رابطے میں رہیں اور متاثرین کی فوری مدد کو یقینی بنائیں۔ اس موقع پر وزیراعظم شہباز شریف نے متاثرہ افراد میں امدادی چیکس تقسیم کیے اور دانش اسکول کے قیام کا اعلان بھی کیا تاکہ علاقے میں تعلیمی سہولیات کو بہتر بنایا جا سکے۔
وزیرِاعظم نے این ڈی ایم اے کو ہدایت دی کہ وہ صوبائی حکومتوں، ضلعی انتظامیہ اور دیگر متعلقہ اداروں کے ساتھ مل کر ریسکیو، ریلیف اور بحالی کے اقدامات میں مزید مؤثر کردار ادا کرے۔ انہوں نے گلگت بلتستان میں پیشگی اطلاعات اور مانیٹرنگ کے لیے مرکز کے قیام کا اعلان بھی کیا، جسے وزارتِ موسمیاتی تبدیلی کے اشتراک سے آئندہ دو ماہ میں مکمل کرنے کی ہدایت دی گئی۔
اجلاس میں وزیرِاعظم کو بتایا گیا کہ وزارتِ موسمیاتی تبدیلی کی جانب سے گلیشیئر لیک آؤٹ برسٹ فلڈ (GLOF) سسٹم کی تنصیب پر تیزی سے پیش رفت جاری ہے، اور اسے دو ماہ میں مکمل کرنے کے لیے NDMA اور وزارت کو باہمی تعاون کی ہدایت دی گئی ہے۔ وزیراعظم نے اس نظام کی تھرڈ پارٹی ویلیڈیشن کروانے کا بھی حکم دیا۔
اجلاس کو بتایا گیا کہ 21 جولائی کو تھک-بابوسر، تھور، کنڈداس اور اشکومن میں کلاؤڈ برسٹ کے باعث شدید بارش سے درجنوں سیاح اور مقامی افراد متاثر ہوئے۔ NDMA، ضلعی انتظامیہ، پاک فوج اور دیگر اداروں نے 600 سے زائد افراد کو کامیابی سے ریسکیو کیا، جبکہ 5 خیمہ بستیاں قائم کی گئیں اور 10 ہیلی کاپٹر و 2 C-130 طیاروں کے ذریعے امدادی پروازیں چلائی گئیں۔
مشیر وزیراعظم انجینئر امیر مقام نے بھی اس موقع پر اظہار خیال کرتے ہوئے کہا کہ وزیراعظم شہباز شریف نے ہر مشکل وقت میں عوام کا ساتھ دیا ہے۔ وہ بلاتفریق عوامی خدمت پر یقین رکھتے ہیں اور متاثرین کے ساتھ دلی ہمدردی کا اظہار کرتے ہیں۔
اجلاس میں وفاقی وزراء انجینئر امیر مقام، عبدالعلیم خان، عطاء اللہ تارڑ، میاں معین وٹو، ڈاکٹر مصدق ملک، مشیر رانا ثناء اللہ، گورنر گلگت بلتستان سید مہدی شاہ، وزیراعلیٰ گلگت بلتستان گلبر خان، چیئرمین NDMA انعام حیدر ملک اور دیگر اعلیٰ سرکاری افسران شریک ہوئے۔