معرکہ حق کے بعد فضائی حدود کی بندش سے نقصانات کی تفصیلات قومی اسمبلی میں پیش

معرکہ حق کے بعد فضائی حدود کی بندش سے 4 ارب روپے کا نقصان ہوا۔ وفاقی وزیر خواجہ آصف نے نقصانات کی تفصیلات قومی اسمبلی میں پیش کردیں۔

قومی اسمبلی میں خواجہ آصف نے معرکہ حق کے بعد فضائی حدود کی بندش سے ہونے والے مالی نقصانات کی تفصیلات پیش کرتے ہوئے بتایا کہ پاکستان نے بھارتی طیاروں کے لیے اپنی فضائی حدود بند کردی، جس کے جواب میں بھارت نے بھی پاکستان کے لیے اپنی فضائی حدود بند کی۔

خواجہ آصف کے مطابق پاکستان کی فضائی حدود بند ہونے سے روزانہ ایک سو سے ڈیڑھ سو بھارتی طیارے متاثر ہوئے ہیں۔ فضائی حدود کی بندش کے باعث پاکستان ائیر پورٹس اتھارٹی کو 24 اپریل سے 30 جون 2025 تک 4.1 ارب روپے کا نقصان ہوا ہے۔

خواجہ آصف نے کہا کہ سال 2019 میں بھی فضائی حدود کی بندش کے باعث پاکستان کو 7.6 ارب روپے کا نقصان اٹھانا پڑا تھا۔

انھوں نے مزید کہا کہ فضائی حدود کی بندش کے باعث پاکستان کو مالی نقصان برداشت کرنا پڑا تاہم قومی خود مختاری، دفاع اور وطن عزیز کا تحفظ ہماری اولین ترجیح ہے، اس وقت بھارت کے علاوہ پاکستان کی فضائی حدود تمام ائیر لائنز کے لیے دستیاب ہے پاکستانی ائیر لائنز اور طیاروں پر بھی بھارتی فضائی حدود میں پرواز پر پابندی ہے۔