رضا اللہ کی آخری وقت تک پاسپورٹ نہ ہونے سے متعلق خبروں کی تردید

پاکستانی فاسٹ بولر رضا اللہ نے انگلینڈ کے خلاف ٹیسٹ ڈیبیو کے لیے ہنگامی بنیادوں پر پاسپورٹ جاری ہونے کی خبروں کی تردید کردی ہے۔

میچ کے بعد میڈیا سے گفتگو کرتے ہوئے رضا اللہ نے واضح کیا کہ ان کا پاسپورٹ تقریباً ایک سال پہلے ہی جاری ہوچکا تھا اور ٹیسٹ ٹیم میں شامل کیے جانے کے بعد ہنگامی بنیادوں پر نیا پاسپورٹ نہیں بنوایا گیا۔

رضا اللہ نے کہا کہ سب سے پہلے یہ کہنا درست نہیں کہ یہ پاسپورٹ ہنگامی بنیادوں پر بنایا گیا تھا، میرا پاسپورٹ ایک سال پہلے ہی جاری ہوچکا تھا۔

فاسٹ بولر کے مطابق انگلینڈ روانگی سے تقریباً ایک ہفتہ قبل انہوں نے اپنا پاسپورٹ جمع کرایا تھا، تاہم اس وقت تک ان کے ممکنہ ٹیسٹ ڈیبیو کے حوالے سے بات چیت شروع ہوچکی تھی۔

انہوں نے بتایا کہ ڈومیسٹک فرسٹ کلاس کرکٹ میں ان کی کارکردگی بھی ٹیسٹ ٹیم میں شمولیت کی گفتگو کی ایک وجہ تھی۔ رضا اللہ نے کہا کہ انہوں نے ڈومیسٹک کرکٹ میں سنچریاں اور نصف سنچریاں بھی اسکور کی ہیں، جس کے باعث یہ بات زیرِ بحث آئی کہ وہ ٹیسٹ کرکٹ میں بھی اچھی کارکردگی دکھا سکتے ہیں یا نہیں۔

رضا اللہ نے کہا کہ وہ ٹیسٹ کرکٹ میں اچھی کارکردگی دکھانے کے لیے پُرامید تھے اور انہیں یقین تھا کہ وہ اس موقع سے فائدہ اٹھا سکتے ہیں۔ ان کے بقول بالآخر انہیں اسی اعتماد کا صلہ ملا۔

پاکستانی فاسٹ بولر نے ایک بار پھر واضح کیا کہ ان کے ٹیسٹ اسکواڈ میں شامل ہونے کو ہنگامی بنیادوں پر پاسپورٹ جاری کیے جانے سے جوڑنا درست نہیں، کیونکہ ان کا سفری دستاویز پہلے ہی کافی عرصہ قبل بن چکا تھا۔

رضا اللہ نے انگلینڈ کے خلاف پاکستان کی جانب سے شاندار ٹیسٹ ڈیبیو کیا اور میچ میں اپنے بیٹ سے بھی فوری اثر ڈالا۔ انہوں نے مشکل صورتحال میں پاکستان کی اننگز کو سنبھالنے میں اہم کردار ادا کیا۔