ویسٹ انڈیز نے دوسرے ون ڈے میں پاکستان کے خلاف ٹاس جیت کر پہلے فیلڈنگ کرنے کا فیصلہ کیا ہے۔

پاکستان اور ویسٹ انڈیز کے درمیان 3 میچوں کی سیریز کا دوسرا ون ڈے آج برائن لارا کرکٹ اکیڈمی میں کھیلا جارہا ہے، میچ کا ٹاس ویسٹ انڈیز کے کپتان شائے ہوپ نے جیت کر پاکستان کو پہلے بیٹنگ کرنے کی دعوت دی ہے۔

ٹاس کے بعد کپتان ویسٹ انڈیز شائے ہوپ نے کہا کہ نمی اور موسم کی وجہ سے پہلے بولنگ کا فیصلہ کیا ہے، پاکستان کو کم اسکور تک محدود کرنے کی کوشش کی جائے گی، بہتر کارکردگی سے سیریز برابر کرنے کی کوشش کریں گے۔

پاکستانی کپتان محمد رضوان کا کہنا تھا کہ پہلے ون ڈے میں لڑکوں نے اچھا پرفارم کیا، نواز نے گزشتہ 2 برس میں شاندار کارکردگی دکھائی، نوجوان کھلاڑیوں کی شمولیت اور کارکردگی خوش آئند ہے۔

دوسرے ون ڈے کے لیے پاکستان ٹیم میں 3 تبدیلیاں کی گئی ہیں، فاسٹ بولر نسیم شاہ، فہیم اشرف اور اسپنر سفیان مقیم کو آرام دیا گیا ہے جبکہ ان کی جگہ فاسٹ بولر حسن علی، اسپنر محمد نواز اور ابرار احمد کو فائنل الیون میں شامل کیا گیا ہے۔

پاکستان کا اسکواڈ

پاکستان کی ٹیم میں کپتان محمد رضوان، عبداللہ شفیق، صائم ایوب، بابر اعظم، سلمان علی آغا، حسن نواز، حسین طلعت، محمد نواز، شاہین شاہ آفریدی، حسن علی اور ابرار احمد شامل ہیں۔

ویسٹ انڈیز کا اسکواڈ

ویسٹ انڈیز کی ٹیم میں کپتان شائے ہوپ، برینڈن کنگ، ایون لوئس، کیاسی کارٹی، شرفین ردر فورڈ، روسٹن چیز، جسٹن گریوز، گوداکیش موتی، شمار جوزف، جیڈن سیلز اور جے دیا بلیڈز شامل ہیں۔

خیال رہے کہ پہلے ایک روزہ میچ میں پاکستان نے حسن نواز اور حسین طلعت کی شاندار بلے بازی کی بدولت میزبان ٹیم کو 5 وکٹوں سے شکست دی تھی۔ قومی ٹیم نے 280 رنز کا ہدف 5 وکٹوں کے نقصان پر حاصل کر لیا تھا۔

واضح رہے کہ اس سے قبل دونوں ٹیموں کے درمیان کھیلی گئی ٹی 20 سیریز میں گرین شرٹس نے 1-2 سے کامیابی حاصل کی تھی۔

2 بار کی عالمی چیمپئن ویسٹ انڈیز ون ڈے ورلڈ کپ میں براہ راست کوالیفائی کرنے کے لیے سیریز کو اہم قرار دے رہی ہے۔

اس سے قبل ویسٹ انڈیز کی ٹیم نے تاریخ میں پہلی بار 2023 میں بھارت میں ہونے والے ورلڈ کپ کے لیے کوالیفائی نہیں کیا تھا۔