بھارتی آرمی چیف جنرل اوپیندر دویدی نے پاکستان کی کامیاب حکمت عملی کا اعتراف کرتے ہوئے تسلیم کیا کہ اگر بھارت نے دوبارہ پیش قدمی کی، تو صورتحال مختلف ہوسکتی ہے اور کہا کہ پاکستان نے اپنی فوجی کامیابی کو عالمی سطح پر مؤثر طریقے سے پیش کیا اور بھارتی فوج کو مزید احتیاط برتنی ہوگی۔
بھارتی آرمی چیف جنرل اپیندر دویدی کے خطاب کی نئی تفصیلات سامنے آئی ہیں، جنہوں نے پاکستان کی کامیاب فوجی حکمت عملی اوراس کے بعد کی عالمی سطح پر عوامی رائے سازی پر کھل کر بات کی۔
بھارتی آرمی چیف اپیندر دویدی نے آئی آئی ٹی مدراس میں بھارتی فوج کے تحقیقاتی سیل کے افتتاح کے دوران کہا کہ بھارت کی سلامتی صرف فوج کی ذمہ داری نہیں ہے، بلکہ یہ ایک مشترکہ قومی کوشش ہے جس میں فوج، سائنسدان، صنعت، تعلیمی ادارے اور عوام کا کردار شامل ہے۔
انہوں نے مزید کہا کہ پاکستان کے ساتھ جنگ میں فتح ”دماغ میں ہوتی ہے“، اور پاکستان نے اپنی کامیابی کو عوام میں مقبول بنانے کے لیے ایک مؤثر حکمت عملی اپنائی ہے۔
اس حوالے سےجنرل دویدی نے کہا، ”پاکستان میں تو جنگ کے بعد آرمی چیف کو فیلڈ مارشل بنا دیا گیا۔“
اس بات سے واضح ہوتا ہے کہ دویدی پاکستانی فوج کی حکمت عملی کو تسلیم کرتے ہوئے اس پر تشویش کا شکار ہیں۔
اس خطاب میں جنرل دویدی نے سائبر دفاعی اقدامات کی اہمیت پر بھی زور دیا اور تسلیم کیا کہ اگلی بار بھارت نے پیش قدمی کی تو صورتحال مختلف ہوسکتی ہے۔
انہوں نے واضح طور پر کہا کہ ”اگر بھارت نے پھر سے حملہ کیا، تو ہمیں نہیں معلوم کہ آیا وہ ملک جو پاکستان کے ساتھ لڑ رہا ہے، تنہا ہوگا یا کسی دوسرے ملک کی مدد حاصل کرے گا۔“
ان کے مطابق، اس صورت میں بھارت کو مزید احتیاط برتنی ہوگی کیونکہ اس بات کا امکان ہے کہ پاکستان تنہا نہ ہو۔
جنرل دویدی نے اپنے خطاب میں آپریشن سندور کا ذکر کیا، جس میں مئی میں پاکستان اور آزاد کشمیر میں کی جانے والی حملوں کا مقصد پہلگام دہشت گرد حملے کا جواب دینا تھا۔ ان حملوں میں جدید ٹیکنالوجی اور میڈیا کے ذریعے معلومات کی جنگ کی اہمیت کو اجاگر کیا گیا۔
بھارتی فوج نے اس پیغام کو عالمی سطح پر پھیلانے کے لیے ایک منظم اطلاعاتی مہم چلائی، جس میں دو خواتین افسران نے پریس کانفرنسز کیں اور آپریشن کا لوگو بھی مقامی سطح پر ڈیزائن کیا۔