انٹرنیشنل کرکٹ کونسل (آئی سی سی) نے ٹی 20 اور ون ڈے پلیئرز کی رینکنگ جاری کردی ہے، پاکستان کے کپتان محمد رضوان اور بابر اعظم کی تنزلی ہوئی ہے۔

ٹی 20 بیٹرز رینکنگ

آئی سی سی کی جانب سے جاری ٹی 20 بیٹرز رینکنگ کے مطابق بیٹرز میں بھارت کے ابھیشیک شرما کا پہلا نمبر برقرار ہے، آسٹریلیا کے ٹم ڈیوڈ 6 درجے ترقی کے بعد ٹاپ 10 میں شامل ہوگئے ہیں، اس ترقی کے بعد ٹم ڈیوڈ کا رینکنگ میں 10 واں نمبر ہے۔

ٹی 20 بیٹرز رینکنگ کے ٹاپ 10 میں پاکستان کا کوئی بیٹر شامل نہیں اور پاکستان کے بابراعظم ایک درجے تنزلی کے بعد 18 ویں نمبر پر چلے گئے ہیں۔

ٹی 20 بولرز رینکنگ

ٹی 20 بولرز میں نیوزی لینڈ کے جیکب ڈفی کا پہلا نمبر برقرار ہے جبکہ ٹی 20 بولرز کے ٹاپ 10 میں بھی پاکستان کا کوئی بولر شامل نہیں۔

آسٹریلیا کے جوش ہیزل ووڈ 3 درجے ترقی کے بعد 20 ویں اور پاکستان کے حارث رؤف 2 درجے ترقی کے بعد 24 ویں نمبر پر آ گئے ہیں۔

دوسری طرف ٹی 20 آل راؤنڈرز میں بھارت کے ہاردیک پانڈیا کا پہلا نمبر برقرار ہے۔

ون ڈے پلیئرز رینکنگ

اس کے علاوہ آئی سی سی ون ڈے پلیئرز رینکنگ میں بھارت کے شبمن گل کی پہلی پوزیشن برقرار ہے جبکہ روہت شرما ایک درجہ بہتری کے بعد دوسری پوزیشن پر آگئے ہیں۔

ون ڈے پلیئرز رینکنگ میں بابر اعظم ایک درجہ تنزلی کے بعد تیسری اور محمد رضوان ایک درجہ تنزلی کے بعد 23 ویں نمبر پر چلے گئے ہیں، اسی فہرست میں پاکستان کے صائم ایوب 9 درجہ تنزلی کے بعد 46 ویں نمبر پر پہنچ گئے ہیں۔

ون ڈے بولرز رینکنگ

ون ڈے بولرز کی رینکنگ میں سری لنکا کے مہیش تھیکشانا کی پہلی پوزیشن برقرار ہے، ویسٹ انڈیز کے گوڈاکیش موتی 5 درجے بہتری کے بعد 12 ویں نمبر پر پہنچ گئے ہیں۔

پاکستان کے شاہین آفریدی ایک درجہ تنزلی کے بعد 13 ویں، ویسٹ انڈیز کے جیڈن سیلز 24 درجے لمبی چھلانگ لگاکر 33 ویں اور ابرار احمد 3 درجہ بہتری کے بعد 54 ویں پوزیشن پر آگئے۔

ون ڈے آل راؤنڈرز رینکنگ میں افغانستان کے عظمت اللہ عمرزئی کی پہلی پوزیشن برقرار ہے۔