خیبرپختونخوا میں سیلاب سے کتنی سڑکوں اور پلوں کو نقصان پہنچا؟ رپورٹ جاری

خیبرپختونخوا میں حالیہ بارشوں اور سیلاب سے سڑکوں، پلوں اور نالوں کی نقصانات سے متعلق رپورٹ جاری کردی گئی ہے۔

کمیونیکیشن اینڈ ورکس ڈیپارٹمنٹ کی رپورٹ کے مطابق صوبے میں بارشوں اور سیلاب سے 238 سڑکوں اور 266 مقامات کو نقصان پہنچا، سیلاب سے متاثرہ 47 روڈز کو مکمل طور پر ٹریفک کے لیے بحال کر دیا گیا ہے جبکہ 172 سڑکوں کو جزوی طور پر ہلکی ٹریفک کے لیے بحال کیا گیا ہے۔

رپورٹ میں کہا گیا کہ سیلاب اور بارشوں سے متاثرہ 47 سڑکیں ابھی تک ٹریفک کے لیے بند ہیں، سوات میں 25 سڑکیں سیلاب سے متاثر ہوئیں جس میں سے 2 پر مکمل طور پر ٹریفک بحال کردی گئی ہے۔ سوات میں 21 روڈز کو جزوی طور پر ہلکی ٹریفک کے لیے کھولا گیا ہے جبکہ 3 سڑکیں ابھی بھی بند ہیں، سوات میں سیلاب اور بارشوں سے 26 مقامات کو نقصان پہنچا۔

لوئر دیر میں 28 سڑکیں سیلاب سے متاثر ہوئیں، جن میں سے 2 سڑکوں کو مکمل اور 19 کو جزوی طور پر ٹریفک کے لیے کھول دیا گیا ہے جبکہ 7 روڈز ابھی بھی مکمل طور پر ٹریفک کے لیے بند ہیں۔ لوئر دیر میں 28 مقامات کو سیلاب اور بارشوں سے نقصان پہنچا۔

ضلع مانسہرہ میں 13 سڑکوں میں سے 8 کو مکمل اور 5 کو جزوی طور پر ٹریفک کے لیے بحال کردیا گیا۔ ملاکنڈ میں 11 سڑکیں بارش اور سیلاب سے متاثر ہوئیں، جن میں سے 5 کو مکمل اور 6 کو جزوی طور پر ٹریفک کے لیے بحال کر دیا گیا۔

مردان میں سیلاب سے 25 سڑکیں متاثر ہوئیں، جس کو ہلکی ٹریفک کے لیے کھول دیا گیا ہے، کرک میں 14 سڑکوں میں سے 3 کو مکمل اور 11 کو جزوی طور پر بحال کردیا گیا۔

خیبرپختونخوا میں بارش اور سیلاب سے 49 پل متاثر ہوئے جس میں سے 4 پلوں کو مکمل جبکہ 32 کو جزوی طور پر بحال کر دیا گیا جبکہ 14 پل ابھی تک ٹریفک کے لیے بند ہیں۔ مردان میں سب سے زیادہ 16 پل سیلاب سے متاثر ہوئے تاہم ان پلوں پر ہلکی ٹریفک بحال کردی گئی ہے۔

ضلع سوات اور لوئر دیر میں 5 اور کوہستان میں 4 پلوں کو سیلاب سے نقصان پہنچا۔ سیلاب اور بارشوں سے خیبرپختونخوا میں 47 نالوں کو بھی نقصان پہنچا، جن میں سے 8 نالوں کو مکمل اور 26 نالوں کو جزوی طور پر بحال کردیا گیا جبکہ 13 نالے تاحال بند ہیں۔