رواں برس ستمبر میں متحدہ عرب امارات میں کھیلے جانے والے ایشیا کپ 2025 میں پاک بھارت میچ کی وجہ سے اسپانسرشپ اور اشتہارات کے نرخ آسمان سے باتیں کرنے لگے ہیں۔
بھارتی میڈیا ٹی وی اشتہارات اور ڈیجیٹل ایڈز کے ریٹ سامنے لے آیا۔ بھارتی میڈیا کے مطابق پاک بھارت میچ کے دوران ٹی وی اشتہار کا ریٹ 10 سیکنڈز کا 16 لاکھ بھارتی روپے ہوگیا جبکہ کوپریزینٹنگ پارٹنرشپ کا ریٹ 18 کروڑ بھارتی روپے ہے۔
اسی طرح ایسوسی ایٹ پارٹنرشپ کا ریٹ 13 لاکھ بھارتی روپے رکھا گیا ہے اور اشتہار کے پیکج کی قیمت 4.48 کروڑ بھارتی روپے ہے۔
بھارتی میڈیا کے مطابق ڈیجیٹل ایڈ ریٹس میں کوپریزینٹنگ اور ہائی لائٹس پارٹنر 30، 30 کروڑ بھارتی روپے میں دستیاب ہے جبکہ کوپاورڈ پیکج 18 کروڑ بھارتی روپے میں دستیاب ہے۔
بھارتی میڈیا رپورٹ کے مطابق رائٹس ہولڈرز ایشیا کپ 2025 میں ریکارڈ ویورشپ کی توقع کر رہے ہیں۔
واضح رہے کہ ایشیا کپ رواں سال 9 ستمبر سے متحدہ عرب امارات میں شروع ہوگا، جس میں پاکستان اور بھارت ایک ہی گروپ میں شامل ہیں۔
پاک بھارت میچ 14 ستمبر کو شیڈولڈ ہے، سپر فور میں ممکنہ ٹاکرا 21 ستمبر کو ہوگا جبکہ فائنل میں پہنچنے کی صورت میں پاک بھارت تیسرا ٹاکرا بھی ممکن ہے۔