واٹس ایپ اینڈرائیڈ صارفین کے لیے ایک نئی اور مفید فیچر پر کام کر رہا ہے جو وائس کالنگ کے تجربے کو مزید بہتر بنانے کے لیے تیار کی گئی ہے۔ تازہ ترین بیٹا ورژن 2.25.23.21 میں اس فیچر کا مشاہدہ معروف ویب سائٹ WABetaInfo نے کیا ہے۔
س نئے فیچر کے تحت، اگر کوئی واٹس ایپ کال اٹینڈ نہ کی جائے تو کال کرنے والے کو ’کال دوبارہ کریں‘ اور ’کینسل‘ کے ساتھ ایک نیا آپشن ’وائس پیغام ریکارڈ کریں‘ بھی نظر آئے گا۔ اس فیچر کی مدد سے صارف فوری طور پر ایک آڈیو پیغام ریکارڈ کر کے کال نہ اٹھانے والے فرد کو بھیج سکتا ہے، بغیر اسکرین چھوڑے یا چیٹ میں واپس جائے۔
یہ بٹن نہ صرف کال اسکرین پر بلکہ اُس شخص کی چیٹ ونڈو میں بھی ظاہر ہوتا ہے جس نے کال مس کی ہو، تاکہ پیغام بھیجنا مزید آسان اور تیز ہو جائے۔ اگرچہ واٹس ایپ پہلے ہی وائس میسج بھیجنے کی سہولت فراہم کرتا ہے، مگر یہ نیا آپشن وقت بچانے اور ہنگامی صورتحال میں فوری پیغام رسانی کے لیے خاص طور پر مفید ثابت ہو سکتا ہے۔
فی الحال یہ فیچر صرف محدود بیٹا صارفین کے لیے دستیاب ہے اور ابھی تک واٹس ایپ یا اس کی پیرنٹ کمپنی میٹا کی جانب سے اس کے عوامی ریلیز کے حوالے سے کوئی باضابطہ اعلان نہیں کیا گیا۔