وزیرِاعظم شہباز شریف نے 300 انسانی جانیں بچانے والے گلگت بلتستان کے ہیروز کو اسلام آباد مدعو کرلیا ہے۔
تفصیلات کے مطابق گلگت بلتستان کے ضلع غذر میں گلیشیئر پھٹنے کی بروقت اطلاع دے کر سیکڑوں افراد کی جانیں بچانے والے 3 چرواہوں کو وزیراعظم شہباز شریف نے اسلام آباد مدعو کرلیا ہے۔
تینوں چرواہوں وصیت خان، انصار اور محمد خان کو وزیرِاعظم شہباز شریف کی ہدایت پر اسلام آباد آنے کی دعوت دی گئی ہے تاہم فلائٹ منسوخ ہونے کی وجہ سے چرواہے آج اسلام آباد نہیں پہنچ سکے۔ فلائٹ منسوخ ہونے کے بعد تینوں چرواہے بذریعہ سڑک آج اسلام آباد روانہ ہوں گے۔
گلگت بلتستان میں مقامی آبادیوں کو گلاف کی پیشگی اطلاع دینے اور سیکڑوں جانیں بچانے کے اقدام کے اعتراف میں وصیت خان، انصار اور محمد خان کو وزیرِ اعظم خصوصی انعام سے نوازیں گے۔
اس موقع پر وزیراعظم نے کہا کہ وصیت خان، انصار اور محمد خان قوم کے ہیرو ہیں، محمد خان، انصار اور وصیت خان نے فرض شناسی کی اعلی مثال قائم کی، مجھ سمیت پوری قوم کوگلگت بلتستان کے ان ہیروز پر فخر ہے۔
واقعے کے حوالے سے گفتگو کرتے ہوئے محمد خان نے بتایا کہ وہ دھماکے کی آواز سے جاگے اور سب سے پہلے بچوں کو محفوظ مقام پر منتقل کیا۔ بعد ازاں جان کی پرواہ کیے بغیر لوگوں کو خبردار کیا، جس کے باعث سیکڑوں افراد کی زندگیاں بچ گئیں۔
انہوں نے مزید کہا کہ اگر پاک فوج بروقت ریسکیو نہ کرتی تو وہ اور دیگر 5 افراد زندہ نہ بچ پاتے۔
واضح رہے کہ چند روز قبل غذر کے علاقے تلی داس میں رات گئے اچانک گلیشیئر پھٹنے سے شدید سیلابی صورتحال پیدا ہوگئی تھی، جس کے نتیجے میں متعدد دیہات زیرآب آگئے اور درجنوں افراد پھنس گئے تھے تاہم بہادر چرواہے محمد خان نے بروقت اطلاع دے کر لوگوں کو محفوظ مقام پر منتقل کیا اور کئی قیمتی جانیں بچ گئی تھیں۔