پاکستان تحریک انصاف (پی ٹی آئی) کی سیاسی کمیٹی کے اعلامیے میں کہا گیا ہے کہ این اے 129 لاہور کے ضمنی الیکشن میں حصہ لیا جائے گا۔
پاکستان تحریک انصاف کی سیاسی کمیٹی کا اجلاس گزشتہ رات اسلام آباد میں زوم پر ہوا، جس کا اعلامیہ جاری کردیا گیا ہے۔
اجلاس کے اعلامیے کے مطابق بانی پی ٹی آئی کا شکریہ ادا کرتے ہیں کہ انہوں نے سیاسی کمیٹی پر مکمل اعتماد کیا، سیاسی معاملات پر مزید مشاورت کے لیے سیاسی کمیٹی کے سپرد کردیے گئے ہیں۔
اعلامیے میں کہا گیا ہے کہ توشہ خانہ ٹرائل کی اڈیالہ جیل میں روزانہ سماعت پر گہری تشویش ہے، روزانہ سماعت سے ملزمان کے بنیادی حقوق متاثر ہوں گے، روزانہ سماعت سے انصاف کی فراہمی میں رکاوٹ پیدا ہو گی۔
سیاسی کمیٹی کے اعلامیے میں کہا گیا ہے کہ 9 مئی کے مقدمات میں نااہلی پانے والے ارکان کو پی ٹی آئی اپنا حقیقی نمائندہ سمجھتی ہے، ناحق سزائیں پانے والے اراکین کو خراج تحسین پیش کرتے ہیں، نااہل ارکان کے حلقوں میں ہونے والے ضمنی انتخابات کا بائیکاٹ کیا جائے گا۔
اعلامیے میں کہا گیا ہے کہ لاہور کے حلقہ این اے 129 پر انتخاب میں حصہ لیا جائے گا، سیاسی کمیٹی نے میاں اظہر کی وفات کے بعد خالی نشست پر امیدوار کھڑا کرنے کا فیصلہ کیا ہے۔
سیاسی کمیٹی کے اجلاس کے اعلامیے میں مزید کہا گیا ہے کہ بانی پی ٹی آئی کی ہدایت پر قومی اسمبلی کی پبلک اکاؤنٹس کمیٹی سے مستعفی ہونے کا اعلان کیا گیا جبکہ قائمہ کمیٹیوں کی چیئرمین شپ اور رکنیت سے بھی فی الفوراستعفیٰ دینے کا فیصلہ ہوا ہے۔
اعلامیے کے مطابق سیاسی کمیٹی نے ناحق سزائیں پانے والے اراکین کو خراج تحسین پیش کیا ہے۔