ایشیا کپ میں آج ہونے والے بھارت کے خلاف سپر فور مرحلے کے میچ کے لیے پاکستان کے ممکنہ 11 کھلاڑیوں کے نام سامنے آئے ہیں۔
دبئی انٹرنیشنل اسٹیڈیم میں چھ روز قبل بھارت کے خلاف 7 وکٹ سے ہارنے والی قومی ٹیم کے 2 کھلاڑی جو گروپ میچ کھیلے تھے، ممکنہ طور پر پلئینگ الیون کا حصہ نہیں ہوں گے۔
پاکستان کی ٹیم مینجمنٹ نے سپر فور مرحلے کے پہلے میچ کے لیے بھارت کے خلاف 12 کھلاڑیوں کا انتخاب کیا ہے، تاہم یو اے ای کے خلاف میچ میں فہیم اشرف کی جگہ ٹیم میں شامل کیے جانے والے خوشدل شاہ کی حتمی ٹیم میں شمولیت کا امکان بہت کم ہے۔ جبکہ ان کی جگہ حسین طلعت یا فہیم اشرف کو ہی موقع دیا جائے گا۔
جیو نیوز کے مطابق جارح مزاج مڈل آرڈر بلے باز حسن نواز اور بائیں ہاتھ کے اسپنر سفیان مقیم پاکستان کی پلیئنگ الیون کا حصہ نہیں ہوں گے۔
ذرائع کا کہنا ہے کہ صاحبزادہ فرحان کے ساتھ فخر زمان اننگز کا آغاز کریں گے، مسلسل ناکام صائم ایوب کو چوتھے یا پانچویں نمبر پر بھیجا جائے گا۔ قومی ٹیم دو فاسٹ بالرز اور دو اسپیشلسٹ اسپنر کے ساتھ میدان میں اترے گی۔
یہ بھی اطلاعات ہیں کہ قومی ٹیم کے پیڈ کوچ مائیک ہیسن اور کپتان سلمان علی آغا نے بھارتی بیٹنگ کو اسپن اٹیک کے بجائے فاسٹ بولنگ سے قابو کرنے کی حکمت عملی تیار کی ہے۔
اطلاعات کے مطابق بھارت کے خلاف پاکستان کے ممکنہ گیارہ کھلاڑی یہ ہوں سکتے ہیں۔
صائم ایوب، صاحبزادہ فرحان، فخر زمان، فہیم اشرف، سلمان علی آغا، محمد نواز، حسین طلعت، محمد حارث (وکٹ کیپر)، شاہین شاہ آفریدی، حارث رؤف اور ابرار احمد۔