مشیر اطلاعات کے پی بیرسٹر سیف کا گورنر  پختونخوا سے متعلق  طنزیہ اعلان

مشیر اطلاعات خیبرپختونخوا بیرسٹر ڈاکٹر سیف نے گورنر کے خلاف طنزیہ انداز اپناتے ہوئے ’’اعلانِ گمشدگی‘‘ جاری کر دیا۔

بیرسٹر سیف نے اپنےاعلانیہ بیان میں کہا کہ گورنر خیبرپختونخوا گزشتہ ایک ہفتے سے لاپتا ہیں، اگر کسی کو کہیں دکھائی دیں تو انہیں گورنر ہاؤس پشاور پہنچا دیا جائے۔

انہوں نے کہا کہ وزیراعلیٰ سہیل آفریدی کے انتخاب کی خبر سنتے ہی گورنر کی ذہنی حالت بگڑ گئی اور سننے میں آیا ہے کہ وہ ذہنی دباؤ کم کرنے کے لیے سندھ کے صحراؤں کا رخ کر چکے ہیں۔

بیرسٹر سیف نے مزید کہا کہ گورنر کو زیادہ دباؤ لینے کی ضرورت نہیں، کیونکہ آئین میں گورنر کے علاوہ کسی اور سے بھی حلف لینے کی گنجائش موجود ہے۔ چیف جسٹس کسی بھی ذمے دار شخص کو وزیراعلیٰ سے حلف لینے کا کہہ سکتے ہیں، جب کہ صوبائی حکومت کی لیگل ٹیم نے ہائی کورٹ سے رجوع کر لیا ہے اور جلد حلف برداری کا معاملہ حل ہو جائے گا۔

انہوں نے طنزیہ انداز میں کہا کہ گورنر تو ویسے بھی ’’فارغ بندہ‘‘ ہیں، نہ کام کے نہ کاج کے بلکہ دشمن اناج کے، ان کا واحد کام وزیراعلیٰ سے حلف لینا تھا، وہ بھی ان سے نہیں ہو رہا۔

بیرسٹر سیف کا اپنے بیان میں مزید کہنا تھا کہ وزیراعلیٰ کے انتخاب کے جمہوری عمل کو متنازع بنانا سیاسی جماعتوں کے منہ پر طمانچہ ہے اور تاریخ میں یہ عمل نام نہاد سیاسی اشرافیہ کے سیاہ باب کے طور پر یاد رکھا جائے گا۔ انہوں نے کہا کہ گورنر کے اس غیر جمہوری رویے سے شاید قبر میں ذوالفقار علی بھٹو کی روح بھی تڑپ اٹھی ہو۔

Similar Posts