نیوزی لینڈ نے دوسرے ون ڈے میں بھی پاکستان کو 84 رنز سے شکست دے کر ٹی 20 کے بعد ون ڈے سیریز بھی 0-2 سے اپنے نام کرلی۔
ہیملٹس کے سیڈون پارک میں کھیلے گئے دوسرے ون ڈے میچ میں نیوزی لینڈ کے 293 رنز کے ہدف کے تعاقب میں پاکستان کی پوری ٹیم مقررہ 50 اوورز بھی نہ کھیل سکی اور 41.2 اوورز میں صرف 208 رنز بناکر ہی ڈھیر ہوگئی۔
نیوزی لینڈ کی بیٹنگ
پاکستان کی دعوت پر نیوزی لینڈ کی ٹیم نے پہلے کھیلتے ہوئے مقررہ 50 اوورز میں 8 وکٹوں کے نقصان پر 292 رنز بنائے۔
نیوزی لینڈ کے اوپنرز نے اچھا آغاز فراہم کیا اور 6.2 اوورز میں 54 رنز کی شراکت قائم کی لیکن اسی اسکور پر نک کیلی 31 رنز بنا کر حارث رؤف کی گیند پر پویلین واپس لوٹ گئے۔
پاکستانی بالرز نے اننگز کی شروعات میں اچھی کارکردگی دکھاتے ہوئے کیوی بیٹرز کو جارحانہ کھیل کھیلنے سے روکے رکھا۔
اس کے بعد وقفے وقفے سے وکٹیں گرتی رہیں تاہم رہیس ماریو 18، ہینری نکولس 22، ڈیرل مچل 18، مائیکل بریسویل 17، نیتھن اسمتھ 8 اور بین سیئرز 6 رنز بنا کر آؤٹ ہوئے۔
ان کے علاوہ پاکستانی نژاد محمد عباس نے اپنے کیریئر کی دوسری اننگ میں بہترین کارکردگی کا مظاہرہ کیا، 132 رنز پر کیویز کے 5 کھلاڑی آؤٹ ہونے پر محمد عباس نے ذمہ دارانہ بیٹنگ کی اور 41 رنز بنائے۔
ساتویں نمبر پر بیٹنگ کے لیے آنے والے مچل ہے ٹیم نے بڑے ہدف کی طرف راہ ہموار کی اور 78 گیندوں پر 99 رنز کی ناقابل شکست اننگز کھیلی، انہوں نے اپنی اننگ میں 7 چھکے اور 7 چوکے لگائے۔
وکٹکیں گرنے کے باوجود مچل ہے نے جارحانہ بلے بازی جاری رکھی اور آخری اوور میں 22 رنز بنائے اور کیویز اننگ کا اختتام 292 رنز 8 کھلاڑیوں کے نقصان پر ہوا۔
پاکستان کی جانب سے فاسٹ بولر حارث رؤف اور وسیم جونیئر نے خوب رنز لٹائے، محمد وسیم جونیئر اور سفیان مقیم نے 2، 2 وکٹیں لیں جبکہ فہیم اشرف، عاکف جاوید اور حارث رؤف کے حصے میں ایک، ایک وکٹ آئی۔
پاکستان کی بیٹنگ
نیوزی کی جانب سے دیے گئے 293 رنز کے ہدف کے تعاقب میں پاکستان کا آغاز انتہائی مایوس کن رہا، قومی ٹیم کی بیٹنگ لائن پھر بری طرح ناکام ہوگئی، کیوی فاسٹ بولرز کے سامنے اوپنرز سمیت مڈل آرڈر بھی ناکام ثابت ہوا۔
آدھی ٹیم صرف 11.4 اوورز میں ہی واپس پویلین لوٹ گئی، ابتدائی 5 بیٹرز ڈبل فیگر میں بھی داخل نہ ہوسکے۔ عبداللہ شفیق اور بابراعظم ایک، ایک، امام الحق 3، کپتان محمد رضوان 5 اور سلمان آغاز 9 رنز بنا کر آؤٹ ہوئے۔
آدھی ٹیم کے آؤٹ ہونے کے بعد ایک اینڈ سے وکٹس گرتی رہیں تاہم دوسرے اینڈ سے فہیم اشرف نے مزاحمت جاری رکھی اور انہوں نے اس دوران اپنی نصف سنچری مکمل کی۔
فہیم اشرف کی مزاحمت 73 رنز تک ہی چل سکی لیکن ان کی یہ اننگز ٹیم کے کام نہ آسکی اور 37.4 اوورز میں پاکستان کی نویں وکٹ 174 رنز پر گر گئی۔
بعدازاں میچ کے دوران حارث رؤف ہیلمٹ پر باؤنسر لگنے کے بعد گراؤنڈ سے باہر چلے گئے جس کے بعد کنکشن قانون کے تحت حارث رؤف کی جگہ نسیم شاہ بیٹنگ کے لیے آئے۔
حادثاتی طور پر ٹیم میں شامل ہونے والے نسیم شاہ نے بھی دیدہ دلیری سے بلے بازی کی اور پاکستان کو 200 رنز عبور کرنے کرنے میں اہم کردار ادا کرتے ہوئے 51 رنز کی شاندار باری کھیلی۔
اس کے علاوہ محمد وسیم جونیر ایک، طیب طاہر 13 اور عاکف جاوید 8 رنز بنا کر آؤٹ ہوئے جبکہ سفیان مقیم 13 رنز پر ناٹ آؤٹ رہے۔
اس طرح پاکستان کی پوری ٹیم 42 ویں اوورز میں 208 رنز بناکر آؤٹ ہوگئی اور کیوی ٹیم نے میچ 84 رنز جیت لیا، اس میچ میں فتح کے ساتھ نیوزی لینڈ نے 3 میچوں کی ون ڈے سیریز بھی میں فیصلہ کن برتری حاصل کرلی۔
نیوزی لینڈ ٹیم کے بین سیئرز نے شاندار بولنگ کا مظاہر کرتے ہوئے 5 شکار کیے جبکہ جیکب ڈفی کے حصے میں 3، وِل اورورکے اور نیتھن اسمتھ کے حصے میں ایک، ایک وکٹ آئی۔
میچ کا ٹاس
اس سے قبل ہیملٹن میں کھیلے جانے والے دوسرے ون ڈے میچ میں پاکستان کے کپتان محمد رضوان نے نیوزی لینڈ کے خلاف ٹاس جیت کر پہلے فیلڈنگ کا فیصلہ کیا۔
میچ کے لیے پاکستانی ٹیم میں 4 تبدیلیاں کی گئی ہیں، سیریز کا پہلا میچ میں کھیلنے والے عثمان خان، محمد علی، عرفان خان نیازی اور نسیم شاہ پاکستانی پلینگ الیون میں شامل نہیں۔
اسی طرح نیوزی لینڈ کے اہم بیٹر مارک چیپمین ہیم اسٹرنگ انجری کے باعث ٹیم کا حصہ نہیں بن سکے۔
رہیس ماریو نے کیویز کی جانب سے ڈیبیو کیا ہے جبکہ بین سیئرز مارک چیمپین کی جگہ نیوزی لینڈ کی ٹیم کا حصہ بنے ہیں۔
پاکستانی اسکواڈ
پاکستانی ٹیم امام الحق ، عبداللہ شفیق ، بابراعظم ، محمد رضوان (کپتان)، سلمان علی آغا، طیب طاہر، فہیم اشرف، محمد وسیم جونیئر، حارث رؤف، سفیان مقیم اور عاکف جاوید پر مشتمل ہے۔
نیوزی لینڈ کا اسکواڈ
نیوزی لینڈ کی ٹیم میں رہیس ماریو، نک کیلی، ہینری نکولس، ڈیرل مچل، مائیکل بریسویل (کپتان)، محمد عباس، مچل ہے، نیتھن اسمتھ، جیکب ڈفی، بین سیئرز، ول اورورکی شامل ہیں۔
واضح رہے کہ نیوزی لینڈ کو 3 میچز پر مشتمل ون ڈے سیریز میں ایک صفر کی برتری حاصل ہے۔