زندہ دلان لاہور عید الفطر بھرپور انداز میں منانے میں مصروف ہیں، عید پر چڑیا گھر میں عوام کا رش بڑھا تو انتظامیہ نے داخلہ ٹکٹ کی قیمت میں 3 گنا اضافہ کردیا، جس پر عوام سیخ پا ہوگئے جبکہ پنجاب کی سینئر وزیر مریم اورنگزیب نے چڑیا گھر کی ٹکٹ کی قیمت میں اضافے سے متعلق وضاحت دے دی۔
ننھے بچوں نے عید الفطر کے آخری روز کو یادگار بنانے کے لیے ماما اور بابا سے ضد کی اور لاہور کے چڑیا گھر پہنچ گئے، بچے جانوروں کے ساتھ تصاویریں بنوانے میں مصروف رہے جبکہ کچھ سیاح جانوروں کے ساتھ مستیاں کر نے میں مصروف نطرآئے۔
عیدالفطر پر بچوں کو تفریح کے لیے چڑیا گھر لانے والے شہری ٹکٹ کی قیمت میں حیران کن اضافے سے پریشان ہوگئے۔ چڑیا گھر کا ٹکٹ 80 روپے سے بڑھا کر 300 روپے کردیا گیا۔
شہریوں نے شکوہ کیا کہ چڑیا گھر ہم غریبوں کے بچوں کے لیے سستی تفریح تھی، اس کو بھی مہنگا کردیا گیا، چڑیا گھر کے اندر بھی کھانے پینے کی اشیا کی قیمتوں میں کئی گنا اضافہ کیا گیا ہے۔
لاہور چڑیا گھر میں ڈولفن فاؤنٹین اور سوزی کا مجسمہ بھی سیاحوں کی توجہ کا مرکز بنا رہا جبکہ سیاحوں کا کہنا تھا کہ ہاتھی کی امید میں ایک اور عید گزر گئی مگر ہاتھی تاحال نہ آسکا۔
لاہور چڑیا گھر میں زائد قیمتوں کی وصولی پر مریم اورنگزیب کا سخت نوٹس
لاہور چڑیا گھر میں زائد قیمتیں وصول کرنے کی شکایات پر پنجاب کی سینئر وزیر مریم اورنگزیب نے سخت نوٹس لے لیا۔
مریم اورنگزیب نے کہا کہ عوام صرف 100 روپے میں پورا چڑیا گھر دیکھ سکتے ہیں، قیمت میں کسی قسم کا کوئی اضافہ نہیں کیا گیا، رینگنے والے جانوروں کو دیکھنے کا ٹکٹ 200 روپے ہے، اسی طرح ایکویریم کا 200 روپے ہے، ہولوگرام کا ٹکٹ 300 روپے ہے۔
انہوں نے مزید کہا کہ یہ نئی سہولیات ہیں جن کی قیمت الگ مقرر کی گئی ہے، چڑیا گھر کا 98 فیصد حصہ 100 روپے میں دیکھا جا سکتا ہے، داخلہ ٹکٹ کے لیے الگ کاؤنٹرز موجود ہیں، ٹکٹنگ سینٹر کے باہر ایک شکایت سیل بھی قائم ہے۔
مریم اورنگزیب کا کہنا تھا کہ 2 سال کے بعد عید الفطر پر چڑیا گھر کھلا ہے، گزشتہ روز 35 ہزار شہری چڑیا گھر آئے جو ریکارڈ ہے، زیادہ افراد کی آمد کی وجہ سے بعض انتظامی مسائل پیدا ہوئے، یقینی بنایا جارہا ہے کہ مستقبل میں ایسا نہ ہو۔