ہالی ووڈ سیریز ‘بریکنگ بیڈ’ کے اداکار 34 سال کی عمر میں انتقال کر گئے

ہالی ووڈ کی مشہور ٹی وی سیریز ’بریکنگ بیڈ‘ میں والٹر وائٹ جونیئر کا کردار ادا کرنے والے اداکار اور معذور افراد کے حقوق کے لیے آواز اٹھانے والے آر جے مِٹے 34 سال کی عمر میں انتقال کر گئے۔

برطانوی خبر رساں ادارے رائٹرز کے مطابق، آر جے مِٹے کا انتقال پیر کے روز امریکی ریاست ٹیکساس کے شہر براؤنس وِل میں ہوا۔ ان کی نمائندگی کرنے والی ٹیلنٹ مینجمنٹ ایجنسی نے ایک بیان میں ان کی موت کی تصدیق کی، تاہم انتقال کی وجہ اور دیگر حالات کے بارے میں تفصیلات نہیں بتائی گئیں۔

آر جے مِٹے کو سب سے زیادہ شہرت مشہور امریکی ٹی وی سیریز ’بریکنگ بیڈ‘ سے ملی، جس میں انہوں نے مرکزی کردار والٹر وائٹ کے بیٹے والٹر جونیئر کا کردارادا کیا تھا۔

سیریز میں والٹر وائٹ ایک ہائی اسکول ٹیچر ہوتا ہے، جو اپنی خفیہ مجرمانہ سرگرمیوں کی وجہ سے ایک خطرناک دنیا میں داخل ہو جاتا ہے۔ آر جے مِٹے نے اس کے بیٹے کا کردار ادا کیا، جو جسمانی معذوری کے ساتھ زندگی گزارتا ہے۔

اس کردار کی خاص بات یہ تھی کہ آر جے مِٹے خود بھی دماغ اور جسم کی حرکت پر اثر انداز ہونے والی بیماری سیریبرل پالسی کا شکار تھے۔ اسی وجہ سے وہ اپنے کردار کی مشکلات اور روزمرہ زندگی کے تجربات کو بہتر انداز میں پیش کر سکے۔

آر جے مِٹے نے ’بریکنگ بیڈ‘ میں والٹر ’فلِن‘ وائٹ جونیئر کا کردار ادا کیا، جو چلنے کے لیے بیساکھیوں کا استعمال کرتا اور بولنے میں بھی مشکلات محسوس کرتا تھا۔

سیریز کے ابتدائی حصوں میں اسے ایک ایسے نوجوان کے طور پر دکھایا گیا جو اپنے والد سے بہت محبت کرتا ہے، لیکن کہانی آگے بڑھنے کے ساتھ اسے اپنے خاندان کے بدلتے حالات اور والد کے خفیہ جرائم کا سامنا کرنا پڑتا ہے۔

سیریز میں ناشتے کی میز پر ان کے بار بار دکھائی دینے والے مناظر کی وجہ سے بعض مداح انہیں ’بریک فاسٹ کنگ‘ بھی کہتے تھے۔

رائٹرز کے مطابق، آر جے مِٹے کی اداکاری نے اس کردار کو حقیقت کے قریب لانے میں اہم کردار ادا کیا۔ ان کی نمائندہ ایجنسی کے بیان میں کہا گیا کہ مِٹے نے اپنے کردار میں حقیقت کا رنگ بھرا اور معذوری کے بارے میں آگاہی اور سب کو ساتھ لے کر چلنے کے پیغام کو عام کرنے کے لیے ایک مضبوط پلیٹ فارم بنایا۔

آر جے مِٹے صرف اداکاری تک محدود نہیں رہے بلکہ انہوں نے معذور افراد کے حقوق اور ان کی بہتر نمائندگی کے لیے بھی کام کیا۔ وہ اسکرین ایکٹرز گلڈ میں معذور اداکاروں کے ترجمان کے طور پر خدمات انجام دیتے رہے اور یونائیٹڈ سیریبرل پالسی فاؤنڈیشن کی مشہور شخصیات میں سفیرکے طور بھی شامل تھے۔

ان کی نمائندہ ایجنسی نے اپنے بیان میں کہا، ’’انتہائی دکھ کے ساتھ ہم اپنے پیارے اداکار، فلاحی کاموں میں حصہ لینے والے اور معذور افراد کے حقوق کے لیے پُرجوش آواز اٹھانے والے آر جے مِٹے کے المناک انتقال کی خبر دے رہے ہیں۔‘‘

ان کی زندگی کا یہ پہلو انہیں دوسرے اداکاروں سے منفرد بناتا تھا، کیونکہ وہ اپنے ذاتی تجربات کو استعمال کرتے ہوئے معذور افراد کے مسائل کو سامنے لانے کی کوشش کرتے تھے۔

آر جے مِٹے 21 اگست 1992 کو امریکی ریاست مسیسیپی کے شہر جیکسن میں پیدا ہوئے۔ پیدائش کے وقت دماغ کو نقصان پہنچنے کے باعث انہیں صحت کے مسائل کا سامنا کرنا پڑا اور تین سال کی عمر میں ان میں سیریبرل پالسی کی تشخیص ہوئی۔

بچپن میں انہیں ٹانگوں کے بریسز اور بیساکھیوں کی ضرورت پڑتی تھی۔ تاہم، کھیلوں اور ورزش کی مدد سے وقت کے ساتھ ان کی جسمانی صلاحیت میں بہتری آئی اور انہیں چلنے کے لیے ان آلات کی ضرورت نہیں رہی۔

ان کی زندگی اس بات کی مثال تھی کہ جسمانی مشکلات کے باوجود انسان اپنی صلاحیتوں کو نکھار سکتا ہے اور دوسروں کے لیے بھی مثبت کردار ادا کر سکتا ہے۔

’بریکنگ بیڈ‘ کے علاوہ آر جے مِٹے نے کئی فلموں میں بھی کام کیا۔ ان کی فلموں میں ’دی ریکال‘ اور ’دی اوک روم‘ شامل ہیں۔ 2021 میں ریلیز ہونے والی فلم ’ٹرائمف‘ میں انہوں نے سیریبرل پالسی کا شکار ایک ہائی اسکول کے پہلوان کا کردار ادا کیا۔

رائٹرز کے مطابق، وہ اپنی نئی فلم ’ٹاکنگ ٹو اسٹرینجرز‘ کی تشہیر میں بھی مصروف تھے اور حالیہ دنوں میں اس فلم کے بارے میں گفتگو کے لیے ایک پوڈکاسٹ میں شریک ہوئے تھے۔

’بریکنگ بیڈ‘ 2008 سے 2013 تک نشر ہوئی اور اسے ٹیلی ویژن کی مقبول ترین ڈراما سیریز میں شمار کیا جاتا ہے۔ اس سیریز نے مجموعی طور پر 16 ایمی ایوارڈز حاصل کیے، جن میں بہترین ڈراما سیریز کے دو ایوارڈز بھی شامل تھے۔

ان کے انتقال کی خبر سامنے آنے کے بعد ’بریکنگ بیڈ‘ میں ان کے ساتھ کام کرنے والے اداکار برائن کرینسٹن، آرون پال اور ڈین نورس نے بھی گہرے دکھ اور افسوس کا اظہار کیا۔

ان کے جذباتی پیغامات سے ظاہر ہوتا ہے کہ آر جے مِٹے صرف ان کے ساتھی اداکار نہیں بلکہ ان کے لیے ایک قریبی اور عزیز دوست کی حیثیت بھی رکھتے تھے۔ ان کی وفات سے مداحوں کے ساتھ ساتھ فلم اور ٹی وی کی دنیا سے وابستہ افراد بھی سوگوار ہیں۔