نئے دور میں کام، تعلیم، تفریح اور سماجی تعلقات، سب کچھ اب ڈیجیٹل اور آن لائن ہو گیا ہے۔ اس تبدیلی نے ہمارے لائف اسٹائل کو یکسر تبدیل کرکے رکھ دیا ہے، جن میں کچھ مثبت اور کچھ منفی پہلو بھی سامنے آئے ہیں۔
ماہرین معاشرتی و نفسیاتی امور کے مطابق ٹیکنالوجی کا استعمال سمجھ داری سے ہو تو زندگی آسان اور منظم بن جاتی ہے لیکن زیادہ استعمال جسمانی اور ذہنی صحت پر منفی اثر ڈال سکتا ہے۔
سب سے بڑا مثبت اثر یہ ہے کہ ٹیکنالوجی نے وقت کی بچت اور کارکردگی میں اضافہ کیا ہے۔ موبائل ایپس، آن لائن سروسز اور سوشل میڈیا پلیٹ فارمز نے ہماری روزمرہ کی کئی مصروفیات آسان اور پریشانیاں حل کر دی ہیں۔
اسی طرح بینکنگ، شاپنگ، تعلیمی کورسز اور ورک فرام ہوم کے مواقع نے زندگی کو زیادہ سہل اور منظم بنایا ہے۔ اس طرح کے مثبت اثرات سے انسان زیادہ آزادی کے ساتھ وقت بچا کر اپنی دلچسپیوں اور معاملات پر توجہ دے سکتا ہے۔
ٹیکنالوجی کے بڑھتے ہوئے اور بے وقت استعمال کے منفی اثرات بھی نظر انداز نہیں کیے جا سکتے۔ مثلاً زیادہ اسکرین ٹائم، موبائل یا کمپیوٹر کو بے وجہ طویل وقت دینا جسمانی صحت پر اثر ڈالتے ہیں، مثلاً آنکھوں کی تھکن، کمر کے درد اور نیند کی کمی۔
اس کے ساتھ ساتھ نفسیاتی اثرات جیسے ڈپریشن، تنہائی یا سماجی تعلقات میں کمی بھی سامنے آئی ہے۔ بچوں میں اسمارٹ فون اور گیمز کے غیر متوازن استعمال سے تعلیمی کارکردگی اور سماجی روابط متاثر ہو سکتے ہیں۔
ٹیکنالوجی نے لائف اسٹائل کے معاشرتی پہلوؤں کو بھی بدل دیا ہے۔ آن لائن کمیونیکیشن کی وجہ سے لوگ اپنے قریبی دوستوں اور خاندان کے ساتھ کم وقت گزارتے ہیں لیکن دوسری طرف سوشل میڈیا کے ذریعے دنیا کے کسی بھی حصے کے لوگوں سے تعلق قائم کرنا ممکن ہو گیا ہے۔
ماہرین کے مطابق لائف اسٹائل میں توازن برقرار رکھنا انتہائی ضروری ہے تاکہ ٹیکنالوجی کے مثبت پہلو سامنے آئیں اور منفی اثرات کم ہوں۔
اس کے علاوہ ٹیکنالوجی نے صحت اور فٹنس کے رویے بھی تبدیل کیے ہیں۔ موبائل ایپس اور اسمارٹ ڈیوائسز کے ذریعے ورزش، ڈائٹ اور نیند کی نگرانی آسان ہوئی ہے جو لائف اسٹائل کو صحت مند بنانے میں مددگار ثابت ہوتی ہیں۔
اس کے برعکس زیادہ اسکرین ٹائم اور سست روی سے جسمانی سرگرمیاں کم ہو جاتی ہیں، جس سے مٹاپا اور دیگر صحت کے مسائل پیدا ہو سکتے ہیں۔
ٹیکنالوجی کے اثرات پر قابو پانے کے لیے ضروری ہے کہ ہم اسے باقاعدہ، متوازن اور محدود طریقے سے استعمال کریں۔ اصول اور اوقات کے مطابق اسکرین ٹائم، روزانہ ورزش اور سماجی تعلقات پر توجہ ٹیکنالوجی کے منفی اثرات کو کم اور مثبت اثرات کو زیادہ کرنے کا بہترین طریقہ ہے۔