ایکسپریس نیوز کے مطابق وزیراعظم محمد شہباز شریف کو قطر کے امیرشیخ تمیم بن حمد الثانی نے ٹیلی فون کیا۔ گفتگو کے دوران دونوں رہنماؤں نے پاکستان اور قطر کے درمیان دوطرفہ تعلقات کی موجودہ رفتار پر اطمینان کا اظہار کیا۔
دونوں رہنماؤں نے برادرانہ تعلقات کو مزید فروغ دینے کے مشترکہ عزم کا اعادہ کیا۔ ٹیلی فونک رابطے میں مشرقِ وسطیٰ کی حالیہ علاقائی پیش رفت پر بھی تفصیلی تبادلۂ خیال کیا گیا۔
وزیراعظم محمد شہباز شریف نے خطے میں امن، مذاکرات اور ثالثی کے فروغ کے لیے قطر کے تعمیری اور فعال کردار کو سراہا اور سفارتی ذرائع سے کشیدگی میں کمی کے لیے قطر کی بامعنی کوششوں کا اعتراف کیا۔
وزیراعظم نے قطری قیادت کو یقین دلایا کہ پاکستان خطے میں امن و استحکام کے قیام کے لیے اپنا مثبت اور ذمہ دارانہ کردار ادا کرتا رہے گا۔ دونوں رہنماؤں نے آئندہ دنوں میں قریبی رابطے میں رہنے پر بھی اتفاق کیا