چیف جسٹس پاکستان جسٹس یحٰیی آفریدی نے ریمارکس دیے کہ نو مئی کے کیسز پر ٹرائل چار ماہ میں مکمل کرنے کا ایک ہی بار آرڈر جاری کریں گے، اسد قیصر کی ضمانت منسوخی کی اپیل واپس لینے پر خارج کر دی گئی۔
سپریم کورٹ میں چیف جسٹس یحییٰ آفریدی کی سربراہی میں تین رکنی بنچ نے نومئی سے متعلق درخواستوں پرسماعت کی، سینیٹراعجازچوہدری کی درخواست ضمانت پرپنجاب حکومت کونوٹس جاری کرتے ہوئے سماعت جمعرات تک ملتوی کردی۔
تین رکنی بنچ نے فرحت عباس کی عبوری ضمانت منظور اور امتیازشیخ کی عبوری ضمانت میں جمعرات تک توسیع کی۔
محمد فہیم قیصرکی ضمانت منسوخی کیلئے اپیل پرسماعت ہوئی تو وکیل بابراعوان نے چارماہ میں ٹرائل مکمل کرنے کے حکمنامے سے متعلق تحفظات کا اظہارکیا توچیف جسٹس نے ریمارکس دیے کہ قانون میں ٹرائل تین ماہ مکمل کرنے کا ذکرہے۔
چیف جسٹس نے کہا کہ تحریری حکمنامے میں ٹرائل مکمل کرنے کیلئے ڈیڈ لائن والی تاریخ بھی لکھ لیںگے، ایف آئی آر ختم کرانے کیلئے متعلقہ فورم سے رجوع کریں۔
وکیل بابراعوان نے سپریم کورٹ کے فیصلے کو چیلنج کرنے کا موقف اپنایا تو چیف جسٹس نے کہاکہ ٹھیک ہے آپ چیلنج کر لیجیے گا، ہم اپیل خارج کر رہے ہیں۔
سابق اسپیکر قومی اسمبلی اسد قیصر کی ضمانت منسوخی کی اپیل پرسماعت کے دوران ایڈیشنل ایڈووکیٹ جنرل خیبرپختوا نے ضمانت منسوخی کی اپیل واپس لینے کا بتایا جس پرعدالت نے اپیل واپس لینے کی بنیاد پرخارج کردی۔
خیبرپختونخوا کی نگران حکومت نے اسد قیصر کی نومئی واقعات میں ضمانت منسوخی کیلئے سپریم کورٹ سے رجوع کیا تھا، صوبائی کابینہ نے اسد قیصر کی ضمانت منسوخی واپس لینے کی منظوری دی تھی۔