ہنگو میں پولیس چیک پوسٹ پر دہشت گردوں کا حملہ، ایک اہلکار شہید، 3 اغوا

خیبر پختونخوا کے ضلع ہنگو میں شاہ الماس پیر کی پہاڑی پر واقع پولیس چیک پوسٹ پر دہشت گردوں نے اچانک حملہ کر دیا، جس کے نتیجے میں ایک پولیس اہلکار شہید ہو گیا جبکہ حملہ آور اہلکاروں کو اغوا کر کے اپنے ساتھ لے گئے۔

پولیس حکام کے مطابق سیکیورٹی فورسز اور پولیس کی بھاری نفری نے موقع پر پہنچ کر علاقے کو گھیرے میں لے لیا ہے اور دہشت گردوں کے ساتھ فائرنگ کا شدید تبادلہ جاری ہے۔

ڈسٹرکٹ پولیس آفیسر (ڈی پی او) ہنگو صلاح الدین کنڈی نے واقعے کی تصدیق کرتے ہوئے بتایا کہ حملہ آور تینوں مغوی پولیس اہلکاروں کو سمانہ پہاڑی کے قریبی علاقے خانانو کوٹہ کی جانب لے گئے ہیں۔

ڈی پی او کا کہنا ہے کہ پولیس اور سیکیورٹی فورسز نے شاہ الماس پیر کی پہاڑی کا کنٹرول دوبارہ حاصل کر لیا ہے اور فرار ہونے والے حملہ آوروں کا تعاقب جاری ہے تاکہ مغوی اہلکاروں کو بحفاظت بازیافت کرایا جا سکے۔

دوسری جانب واقعے میں جامِ شہادت نوش کرنے والے کانسٹیبل فیروز علی کی نمازِ جنازہ پولیس لائن ہنگو میں کامل سرکاری اعزاز کے ساتھ ادا کر دی گئی ہے۔

نمازِ جنازہ میں ڈی پی او ہنگو صلاح الدین کنڈی، پاک فوج اور پولیس کے اعلیٰ افسران سمیت بڑی تعداد میں جوانوں نے شرکت کی۔

جنازے کی ادائیگی کے بعد شہید کا جسدِ خاکی تدفین کے لیے ان کے آبائی گاؤں ابراہیم زئی روانہ کر دیا گیا ہے، جبکہ علاقے میں سیکیورٹی ہائی الرٹ کر کے سرچ آپریشن مزید تیز کر دیا گیا ہے۔