عمران خان کو جیل سے اسپتال منتقل کیے جانے کا امکان

راولپنڈی کی اڈیالہ جیل میں قید پاکستان تحریک انصاف (پی ٹی آئی) کے بانی کی طبیعت کے پیشِ نظر انہیں آئندہ چند روز میں اسپتال منتقل کیے جانے کا امکان ظاہر کیا گیا ہے۔

جیل ذرائع اور قانونی ٹیم کے مطابق گزشتہ روز وکلا سردار لطیف کھوسہ اور بیرسٹر سلمان صفدر کی بانی پی ٹی آئی اور ان کی اہلیہ بشریٰ بی بی سے تقریباً چار گھنٹے طویل ملاقات ہوئی۔ اس دوران ان کی صحت، زیرِ سماعت قانونی مقدمات، مجوزہ اٹھائیسویں آئینی ترمیم اور دیگر اہم سیاسی و قومی امور پر تفصیلی مشاورت کی گئی۔

ملاقات کے بعد میڈیا سے گفتگو کرتے ہوئے سردار لطیف کھوسہ اور سلمان صفدر نے اس طویل ملاقات اور اس میں ہونے والی گفتگو کی تصدیق کی ہے۔

ذرائع کے مطابق ملاقات کے دوران بانی پی ٹی آئی نے ملک میں نئے صوبے بنائے جانے کی تجویز کی حمایت کا اظہار بھی کیا ہے۔

ذرائع کا کہنا ہے کہ پمز اسپتال میں طبی معائنے کی تیاریوں اور وکلا کے ساتھ اس طویل ملاقات جیسے اقدامات موجودہ کشیدہ سیاسی منظرنامے میں فریقین کے درمیان اعتماد سازی کے عمل کو آگے بڑھانے کے نئے امکانات کو جنم دے رہے ہیں۔

حالیہ سیاسی تناؤ کے تناظر میں یہ بھی محسوس کیا جا رہا ہے کہ پاکستان تحریک انصاف، جمعیت علمائے اسلام، مسلم لیگ ق، عوامی نیشنل پارٹی اور دیگر جماعتوں کا حکمران اتحاد کے ساتھ پایا جانے والا تناؤ اسی صورت میں کم ہو سکتا ہے جب تمام فریقین کے مابین مذاکرات اور باہمی ملاقاتوں کے دروازے کھلے رکھے جائیں۔

سیاسی حلقوں میں اس طویل ملاقات کو موجودہ ڈیڈلاک کے خاتمے اور آئندہ کے لائحہ عمل کے لیے ایک اہم پیشرفت قرار دیا جا رہا ہے۔

ملاقات کے دوران بانی پی ٹی آئی نے جیل میں فراہم کی جانے والی سہولیات پر بھی اطمینان کا اظہار کیا ہے۔

ذرائع کا کہنا ہے کہ آنے والے دنوں میں قانونی ٹیم اور دیگر متعلقہ فریقین کے درمیان رابطے مزید تیز ہونے کا امکان ہے، جو ملکی سیاسی استحکام اور آئینی معاملات پر نمایاں اثرات مرتب کر سکتے ہیں۔