مذاکرات میں پیشرفت کی صورت میں ایران پر دوبارہ حملوں کا امکان انتہائی کم ہے: صدر ٹرمپ

امریکی صدر ڈونلڈ ٹرمپ نے ایران کے خلاف دوبارہ جنگ شروع کرنے کے امکان کو انتہائی کم قرار دیتے ہوئے کہا ہے کہ اگر جوہری پروگرام اور آبنائے ہرمز پر مذاکرات میں پیشرفت ہوئی تو فوجی کارروائی کی ضرورت نہیں پڑے گی۔

امریکی خبر رساں ادارے ’’سی این این‘‘ کو دیے گئے ٹیلی فونک انٹرویو میں امریکی صدر ڈونلڈ ٹرمپ نے کہا کہ اگر ایران کے ساتھ جنگ ختم کرنے کے لیے جاری مذاکرات میں پیش رفت ہوتی رہی تو ان کی جانب سے ایران پر نئے حملوں کا حکم دینے کا امکان انتہائی کم ہے، ایران بھی معاہدہ کرنے کے لیے بہت بے تاب ہے تاہم اگر ضرورت پڑی تو فوجی کارروائی سے گریز نہیں کریں گے۔

صدر ٹرمپ نے کہا کہ اس بات کا انحصار ایران کے ساتھ مضبوط معاہدے پر ہے، اگر ایران معاہدے پر دستخط کرتا ہے تو دوبارہ جنگ کی ضرورت پیش آنے کا امکان بہت کم ہے۔ انہوں نے دعویٰ کیا کہ ایران کی معیشت زوال پذیر ہے اور ملک میں مہنگائی کی شرح 301 فیصد تک پہنچ چکی ہے۔

امریکی صدر کا کہنا تھا کہ ایران مالی طور پر کمزور ہوتا جارہا ہے، امریکا نے ایران کو فوجی لحاظ سے بھی شدید نقصان پہنچایا ہے اور ضرورت پڑنے پر اسے مزید نقصان پہنچایا جاسکتا ہے۔

صدر ٹرمپ نے کہا کہ ایران کے خلاف دوبارہ فوجی کارروائی کا امکان کم ہے تاہم امریکی افواج خطے میں مکمل طور پر تیار ہیں۔ ان کے مطابق امریکا کے 3 طیارہ بردار بحری جہاز خطے میں موجود ہیں اور تینوں فوجی کارروائی کے لیے مکمل تیار ہیں جب کہ ایک طیارہ بردار بحری جہاز حال ہی میں پہنچا ہے۔

انہوں نے مزید کہا کہ امریکا نے ایران کے اندر اہم تنصیبات کو بھی ممکنہ حملوں کے لیے نشانے پر رکھا ہوا ہے، جن میں بجلی گھر اور پل شامل ہیں۔

صدر ٹرمپ نے دعویٰ کیا کہ امریکا نے ایران کے 38 پلوں کی نشاندہی کر رکھی ہے جنہیں ایک گھنٹے کے اندر تباہ کیا جاسکتا ہے تاہم امریکی صدر کا کہنا تھا کہ وہ ایرانی بنیادی ڈھانچے کو تباہ نہیں کرنا چاہتے کیوں کہ ان کی دوبارہ تعمیر میں تقریباً 10 سال لگ سکتے ہیں۔ ان کا کہنا تھا کہ پلوں کی تعمیر مشکل کام ہے اور وہ انہیں تباہ کرنے کے حق میں نہیں ہیں۔

رپورٹ کے مطابق گزشتہ منگل کو ہونے والے وسط مدتی انتخابات کے بعد مشرق وسطیٰ میں سفارتی سرگرمیوں میں تیزی آئی ہے۔ جمعے کو قطر نے بتایا تھا کہ امریکی صدر ڈونلڈ ٹرمپ نے قطری امیر شیخ تمیم بن حمد آل ثانی سے ٹیلی فونک رابطہ کرکے کشیدگی میں کمی کے معاملے پر گفتگو کی تھی۔

اس سے ایک روز قبل ایرانی وزیر خارجہ عباس عراقچی نے سعودی عرب، متحدہ عرب امارات، عمان، پاکستان، کویت، اردن، ترکیہ، قبرص اور قطر کے وزرائے خارجہ سے بھی رابطے کیے تھے۔

دوسری جانب ایران اور امریکا کے درمیان مذاکرات کی موجودہ صورت حال کے حوالے سے دونوں ممالک اور ثالثی کرنے والے قطر نے خاموشی اختیار کر رکھی ہے۔

صدر ٹرمپ نے ایران کی دفاعی صلاحیت کے حوالے سے دعویٰ کیا کہ امریکی حملوں میں ایرانی فضائی دفاعی نظام مکمل طور پر تباہ ہوچکا ہے اور اب ایران کے پاس طیارہ شکن نظام باقی نہیں رہا۔ انہوں نے مزید دعویٰ کیا کہ ایران کی میزائل بنانے کی صلاحیت تقریباً 10 فیصد جب کہ ڈرون تیار کرنے کی صلاحیت 15 فیصد رہ گئی ہے۔

امریکی صدر کے مطابق ایران کی بیشتر ڈرون اور میزائل فیکٹریاں تباہ ہوچکی ہیں، جس کے باعث اس کی دفاعی پیداواری صلاحیت شدید متاثر ہوئی ہے۔