ممبئی: گوری خان کے مشہور اور پوش ریستوران ”توری“ کو حال ہی میں ایک تنازعے کا سامنا کرنا پڑا ہے، جب ایک یوٹیوبر نے وہاں جعلی پنیر پیش کیے جانے کا دعویٰ کیا۔
یوٹیوبر سارتھک سچدیوا نے سوشل میڈیا پر ایک ویڈیو شیئر کی، جس میں وہ توری کے کھانے میں استعمال ہونے والے پنیر کا ٹیسٹ کرتے دکھائی دے رہے ہیں۔
شاہ رخ کی بہن شہناز، شاہ رخ سے بھی آگے، لیکن ایک حادثے نے زندگی بدل دی
ویڈیو میں سارتھک پنیر پر آیوڈین ٹکنچر ٹیسٹ کر رہے ہیں، جو عموماً کھانے میں نشاستے کی موجودگی جانچنے کے لیے استعمال ہوتا ہے۔ پنیر کے ٹکڑے پر آیوڈین لگانے سے اس کا رنگ سیاہ ہو گیا، جس پر یوٹیوبر نے دعویٰ کیا کہ اس میں نشاستہ شامل ہے اور یہ ”جعلی پنیر“ ہونے کا ثبوت ہے۔
سارتھک نے حیرت کا اظہار کرتے ہوئے کہا: ”شاہ رخ خان کے ریسٹورنٹ میں جعلی پنیر؟ یہ دیکھ کر میرے تو ہوش اُڑ گئے۔“
’لیٹنٹ‘ تنازعے کے بعد اپوروا مکھیجا گھر چھوڑنے پر مجبور؟
یہ ویڈیو جلد ہی وائرل ہو گئی، اور سوشل میڈیا پر گرما گرم بحث چھڑ گئی۔ اس تنازعے کے جواب میں توری کی انتظامیہ نے وضاحت دیتے ہوئے کہا: ’آیوڈین ٹیسٹ صرف نشاستے کی موجودگی ظاہر کرتا ہے، پنیر کی اصل یا نقل ہونے کا نہیں۔ ہماری ڈشز میں سویا پر مبنی اجزاء شامل ہوتے ہیں، اسی لیے رنگ کی تبدیلی ایک متوقع ردعمل ہے۔ ہم اپنے پنیر اور تمام اجزاء کی خالصیت پر پورا بھروسہ رکھتے ہیں۔‘
دلچسپ بات یہ ہے کہ سارتھک نے ممبئی کے دیگر مشہور ریستورانوں جیسے ویرات کوہلی کا ون ایٹ کمیون (One8 Commune)، شلپا شیٹی کا باسٹین (Bastian)، بوبی دیول کا سمپلز ایلس میں بھی یہی ٹیسٹ کیا، مگر ان جگہوں پر پنیر کا رنگ نہیں بدلا جو کہ نشاستے کی غیر موجودگی کو ظاہر کرتا ہے۔
ریستوران کی وضاحت کے بعد سارتھک نے مزاحیہ انداز میں تبصرہ کیا:
”تو کیا اب مجھ پر پابندی ہے؟ ویسے آپ کا کھانا لاجواب ہے!“
گوری خان، جو کہ ایک معروف انٹیریئر ڈیزائنر بھی ہیں، ”توری“ سمیت ممبئی کے کئی نامور ریستورانوں اور مشہور شخصیات کے گھروں کو ڈیزائن کر چکی ہیں۔ وہ ”گوری خان ڈیزائنز“ کی مالک ہیں اور شہر کے فیشن ایبل لائف اسٹائل میں ایک نمایاں نام سمجھی جاتی ہیں۔