اسلام آباد میں موٹر سائیکلوں پربھی ایم ٹیگ لگانے کا فیصلہ

شہر اقتدار کی ضلعی انتظامیہ نے موٹر سائیکلوں پر بھی ایم ٹیگ لگانے کا فیصلہ کر لیا ہے، جس کے تحت شہری اپنی بائیک، ملکیتی کاغذات اور شناختی کارڈ کے ہمراہ چند منٹ میں ایم ٹیگ حاصل کر سکیں گے۔

سماجی رابطے کی ویب سائٹ ایکس پر ڈی سی اسلام آباد نے اپنے پیغام میں کہا کہ شہر بھر میں قائم 13 مخصوص پوائنٹس پر موٹر سائیکلوں کیلئے ایم ٹیگ سروس فراہم کی جا رہی ہے، جہاں شہری صرف 5 منٹ میں ٹیگ لگوا سکتے ہیں۔

اب آپ اپنی موٹرسائیکل، ملکیتی کاغذات اور شناختی کارڈ کے ساتھ 5 منٹ میں ایم ٹیگ لگوا سکتے ہیں، شہر بھر میں قائم 13 پوائنٹس پر بائکس کے لیے بھی سروس دی جا رہی ہے، بغیر ایم ٹیگ بائک چلانے پر آپ کو قانونی کاروائی کا سامنا کرنا پڑ سکتا ہے، شہر کو محفوظ بنانے میں ضلعی انتظامیہ کا ساتھ… pic.twitter.com/dhJ22fGxSv
— DC Islamabad (@dcislamabad) February 20, 2026

انتظامیہ نے واضح کیا ہے کہ بغیر ایم ٹیگ موٹر سائیکل چلانے والوں کے خلاف قانونی کارروائی عمل میں لائی جائے گی۔

حکام کا کہنا ہے کہ اس اقدام کا مقصد شہر میں سیکیورٹی کو مزید بہتر بنانا اور جرائم کی روک تھام میں مدد فراہم کرنا ہے۔ 

جبکہ شہریوں سے اپیل کی گئی ہے کہ وہ ضلعی انتظامیہ کے ساتھ تعاون کرتے ہوئے جلد از جلد اپنی بائیکس پر ایم ٹیگ لگوائیں۔