دنیا کے بڑے بحری جہاز کی آخری منزل کیا ہوگی؟
امریکا کا تاریخی بحری جہاز ایس ایس یونائیٹڈ اسٹیٹس اپنی آخری منزل کی جانب رواں دواں ہے، جہاں اسے خلیج میکسیکو میں ڈبو کر دنیا کی سب سے بڑی مصنوعی آبی چٹان میں تبدیل کیا جائے گا۔ کبھی بحرِ اوقیانوس عبور کرنے کا رفتار کا عالمی ریکارڈ رکھنے والا یہ جہاز اب سمندری حیات کی نئی پناہ گاہ اور غوطہ خوروں کی توجہ کا مرکز بنے گا۔
برطانوی اخبار ’دی گارجین‘ کے مطابق امریکی ریاست الاباما کے شہر موبائل سے پانچ ٹگ بوٹس کی مدد سے اس جہاز کو پیر کے روز روانہ کیا گیا۔ اسے فلوریڈا کے شہر ڈیسٹن کے ساحل سے تقریباً 25 میل دور بدھ کی سہ پہر ایک باقاعدہ آپریشن کے ذریعے سمندر میں ڈبویا جائے گا۔
تقریباً 300 میٹر طویل یہ جہاز اپنی سابقہ شان و شوکت کے برعکس اب زنگ آلود حالت میں ہے۔ اسے سمندر برد کرنے سے پہلے اس کے دونوں بڑے چمنیاں اور مستول ہٹا دیے گئے ہیں، جب کہ اندرونی سامان اور زہریلے مواد کو بھی نکال دیا گیا ہے۔ جہاز کو کنٹرولڈ طریقے سے پانی سے بھر کر ڈبویا جائے گا اور اس مقصد کے لیے دھماکا خیز مواد استعمال نہیں ہوگا۔
ایس ایس یونائیٹڈ اسٹیٹس نے جولائی 1952 میں بحرِ اوقیانوس کو صرف 3 دن، 10 گھنٹے اور 40 منٹ میں عبور کرکے ریکارڈ قائم کیا تھا۔
اس سفر میں اس کی اوسط رفتار تقریباً 36 ناٹ، یعنی 41.4 میل فی گھنٹہ رہی۔ مسافر بردار بحری جہاز کے طور پر بحرِ اوقیانوس عبور کرنے کا یہ ریکارڈ آج تک برقرار ہے۔ اپنے عروج کے دور میں اس جہاز پر امریکی صدور، شاہی شخصیات اور معروف شخصیات بھی سفر کرچکی ہیں۔
جہاز کو 1969 میں مسافروں کی تعداد میں کمی اور یورپ کے لیے فضائی سفر کے بڑھتے رجحان کے باعث سروس سے نکال دیا گیا تھا۔ اس کے بعد اسے تیرتے ہوئے ہوٹل، عجائب گھر اور تفریحی مقام میں تبدیل کرنے سمیت کئی منصوبے پیش کیے گئے، تاہم کوئی بھی منصوبہ مالی وسائل اور مطلوبہ حمایت حاصل نہ کرسکا۔
جہاز کو بچانے کی کوششیں کرنے والی تنظیم ایس ایس یونائیٹڈ اسٹیٹس کنزروینسی بھی اسے محفوظ رکھنے کے لیے طویل عرصے تک سرگرم رہی۔ 2021 میں فلاڈیلفیا کی بندرگاہ نے جہاز کی روزانہ ڈاکنگ فیس بڑھا کر 1700 ڈالر کردی، جسے تنظیم برداشت نہیں کرسکی۔ بالآخر 2024 میں عدالتی حکم کے ذریعے اسے بندرگاہ سے ہٹایا گیا اور اس کے ختم کیے جانے کا خدشہ پیدا ہوگیا۔
اسی سال فلوریڈا کی اوکالوسا کاؤنٹی نے 10 لاکھ ڈالر میں جہاز خرید کر اسے مصنوعی آبی چٹان بنانے کا منصوبہ آگے بڑھایا۔ اس مقصد کے لیے جہاز کو موبائل منتقل کیا گیا، جہاں اسے سمندر برد کرنے سے پہلے کئی ماہ تک تیار کیا جاتا رہا۔
منصوبے کے تحت غوطہ خور اس جہاز کو سمندر کی تقریباً 180 فٹ گہرائی میں دیکھ سکیں گے۔ ایس ایس یونائیٹڈ اسٹیٹس کنزروینسی کی صدر سوزن گبز کے مطابق جہاز سمندر میں موجود رہتے ہوئے ایک متحرک آبی مسکن بنے گا، جہاں سمندری حیات کو نئی جگہ میسر آئے گی۔
جہاز کے تاریخی ورثے کو محفوظ رکھنے کے لیے ساحل پر ایک عجائب گھر بنانے کا منصوبہ بھی تیار ہے، جہاں اس کی دونوں چمنیاں اور جہاز سے وابستہ مختلف تاریخی اشیا رکھی جائیں گی۔ اس کے علاوہ ایک ایسا گھاٹ بھی بنایا جائے گا جہاں سے سیاح اور غوطہ خور مصنوعی چٹان تک جانے کے لیے کشتیاں حاصل کرسکیں گے۔
سوزن گبز کا کہنا ہے کہ اگرچہ جہاز اب سمندر کی تہہ میں ہوگا، لیکن اس کی کہانی زندہ رہے گی۔ ان کے دادا ولیم فرانسس گبز نے اس جہاز کو ڈیزائن کیا تھا اور اسے اپنی بہترین تخلیقات میں شمار کرتے تھے۔