سردیوں میں گیزر کا زیادہ استعمال، گیس اور بجلی کا بل کیسے کم کریں؟

سردیوں کی آمد کے ساتھ ہی گھروں میں گرم پانی کی ضرورت بڑھ جاتی ہے، جس کے باعث گیزر کا استعمال بھی زیادہ ہونے لگتا ہے۔ تاہم گیزر کو ضرورت سے زیادہ دیر تک چلانا گیس اور بجلی کے بل میں اضافے کا سبب بن سکتا ہے، تاہم چند آسان احتیاطی تدابیر اپنا کر گرم پانی کی سہولت برقرار رکھنے کے ساتھ گھریلو اخراجات بھی کم کیے جا سکتے ہیں۔

بجلی اور گیس کی بڑھتی ہوئی قیمتوں اور پیچیدہ ٹیرف نے صارفین کو پہلے ہی اضافی بل کی صورت میں پریشانی سے دوچار کیا ہوا ہے ایسے میں سرد موسم میں گیزر کا استعمال ضروری بھی ہے اور بل کی ٹینشن بھی سر پر سوار رہتی ہے، ایسے میں آپ چند احتیاتی تدابیر پر عمل کرکے بجلی اور گیس کے بل پرکافی حد تک کنٹرول رکھ سکتے ہیں۔

جدید گیزرز میں عام طور پر پہلے سے خودکار نظام موجود ہوتا ہے جو پانی مقررہ درجہ حرارت تک گرم ہونے کے بعد ہیٹنگ بند کردیتا ہے۔ تاہم اس کا مطلب یہ نہیں کہ گیس یا بجلی کا خرچ مکمل طور پر رک جاتا ہے۔ بعض گیزر پانی کا درجہ حرارت کم ہونے پر خودکار طور پر دوبارہ گرم کرنا شروع کردیتے ہیں، جس سے توانائی استعمال ہوتی رہتی ہے۔

گیزر کا سائز گھر کی ضرورت کے مطابق منتخب کریں

اگر آپ گھر کے لیے نیا گیزر خریدنے کا ارادہ رکھتے ہیں تو سب سے پہلے گھر کے افراد کی تعداد اور گرم پانی کی روزانہ ضرورت کو مدنظر رکھیں۔ ضرورت سے زیادہ بڑا گیزر زیادہ پانی گرم کرنے کی صلاحیت رکھتا ہے، جس سے بجلی یا گیس کا استعمال بڑھ سکتا ہے۔

اس لیے ایسا گیزر منتخب کرنا بہتر ہے جو گھر کی ضرورت کے مطابق ہو۔ اس کے علاوہ گیزر کی توانائی بچانے کی درجہ بندی بھی دیکھیں۔ جہاں دستیاب ہو، زیادہ توانائی مؤثر ماڈل کا انتخاب طویل مدت میں بجلی یا گیس کے اخراجات کم کرنے میں مدد دے سکتا ہے۔ تاہم صرف اسٹار ریٹنگ پر انحصار کرنے کے بجائے گیزر کی اصل توانائی کھپت اور مقامی معیار کو بھی مدنظر رکھنا چاہیے۔

گیزر کا درجہ حرارت کتنا ہونا چاہیے؟

گیزر کا درجہ حرارت مناسب سطح پر رکھنا بھی توانائی کی بچت کا اہم طریقہ ہے۔ بعض گھریلو واٹر ہیٹرز کے لیے تقریباً 50 سے 60 ڈگری سینٹی گریڈ کا درجہ حرارت موزوں ہوسکتا ہے، جبکہ بعض گیزروں میں 55 ڈگری سینٹی گریڈ کی ترتیب استعمال کی جاسکتی ہے۔ تاہم درست درجہ حرارت کا انحصار گیزر کی قسم، اس کے نظام اور کمپنی کی ہدایات پر ہوتا ہے۔

پانی کو ضرورت سے زیادہ گرم رکھنے سے توانائی کا استعمال بڑھ سکتا ہے۔ دوسری جانب پانی کا محفوظ درجہ حرارت برقرار رکھنا بھی ضروری ہے تاکہ جراثیم کی افزائش کے خطرے اور بہت گرم پانی سے جلنے کے امکان کو قابو میں رکھا جاسکے۔

نہانے کے لیے تقریباً 37 سے 40 ڈگری سینٹی گریڈ درجہ حرارت کا پانی عموماً آرام دہ محسوس ہوتا ہے، تاہم یہ ہر شخص کی پسند کے مطابق مختلف ہوسکتا ہے۔ اگر پانی زیادہ گرم ہو تو استعمال سے پہلے اس میں ٹھنڈا پانی شامل کرلیں۔

یاد رکھیں گیزر کا درجہ حرارت، اس کی ساخت، کنڈیشن، گیزر میں موجود پانی کا درجہ حرارت اور دی گئی ہدایات کے مطابق مختلف ہوسکتا ہے اس لیے بہت مناسب درجہ حرارت کے لیے آپ کی توجہ اور پلاننگ بہت اہمیت رکھتی ہے۔

گیزر کب آن اور آف کرنا چاہیے؟

بجلی اور گیس کی بچت کے لیے گیزر کو بلا ضرورت مسلسل آن رکھنے سے گریز کریں۔ اگر گھر میں گرم پانی کی ضرورت مخصوص اوقات میں ہوتی ہے تو گیزر کو استعمال کے مطابق چلانا زیادہ مؤثر ہوسکتا ہے۔

ٹائمر کی مدد سے بھی گیزر کو مقررہ وقت پر آن اور آف کیا جاسکتا ہے، جس سے غیر ضروری طور پر آلہ چلتا رہنے کے امکانات کم ہوجاتے ہیں۔ تاہم گیزر کو بند کرنے اور دوبارہ چلانے کے حوالے سے اس کے استعمال کی ہدایات پر عمل کرنا ضروری ہے۔

یہ بھی یاد رکھیں کہ تمام گیزرز کے لیے پانی گرم ہونے کا کوئی ایک مقررہ وقت نہیں ہوتا۔ چھوٹے گیزر نسبتاً جلد پانی گرم کرسکتے ہیں، جبکہ زیادہ گنجائش والے اسٹوریج گیزرز کو زیادہ وقت درکار ہوتا ہے۔ اس کا انحصار گیزر کی طاقت، گنجائش اور پانی کے ابتدائی درجہ حرارت پر ہوتا ہے۔

گیس کے گیزر سے خرچ کیسے کم کریں؟

گیس کے استعمال کا انحصار گیزر کی ساخت، پانی گرم کرنے کے درجہ حرارت اور روزانہ استعمال پر ہوتا ہے۔ گیس کی بچت کے لیے پانی کو اپنی ضرورت کے مطابق گرم کریں اور درجہ حرارت کمپنی کی ہدایات کے مطابق رکھیں۔

استعمال کے بعد گیزر بند کرنے کے حوالے سے اس کے آپریٹنگ مینوئل میں دی گئی ہدایات پر عمل کریں۔ گیزر کی باقاعدگی سے دیکھ بھال بھی ضروری ہے تاکہ وہ بہتر کارکردگی کے ساتھ کام کرسکے۔

اگر گیزر کی آگ، پانی گرم کرنے کی رفتار یا گیس کی فراہمی میں غیر معمولی تبدیلی محسوس ہو تو خود مرمت کرنے کے بجائے مستند ٹیکنیشن سے معائنہ کروائیں۔ اس کے حفاظتی نظام میں خود سے تبدیلی کرنا خطرناک ثابت ہوسکتا ہے۔

پائپوں کی کنڈیشن اور پانی کی بچت بھی ضروری

گیزر سے گرم پانی حاصل کرنے کے دوران پانی کا غیر ضروری استعمال بھی توانائی کے اخراجات بڑھا سکتا ہے، کیونکہ زیادہ پانی گرم کرنے کے لیے زیادہ گیس یا بجلی درکار ہوتی ہے۔

گرم پانی لے جانے والے پائپوں پر مناسب انسولیشن کرنے سے پانی کی حرارت دیر تک برقرار رکھنے میں مدد مل سکتی ہے، جس کے نتیجے میں دوبارہ پانی گرم کرنے کی ضرورت کم ہوسکتی ہے۔

نہانے کے لیے بالٹی استعمال کرنا پانی کی مقدار کو کنٹرول کرنے کا ایک آسان طریقہ ہے۔ اسی طرح شاور کے دوران زیادہ وقت نہ گزاریں اور ضرورت نہ ہونے پر نل بند رکھیں۔ اگر گھروں میں نل یا پائپ سے پانی لیک ہو رہا ہو تو اسے فوری طور پر ٹھیک کروائیں۔

گرم پانی حاصل کرنے کے انتظار میں بھی نل کو غیر ضروری طور پر کھلا نہ چھوڑیں، کیونکہ اس سے پانی کا ضیاع ہوتا ہے۔

گیزر کی صفائی اور حفاظتی اقدامات کیوں ضروری ہیں؟

اس کے ستاھ ہی ایک اور اہم معاملے پر توجہ دینا ضروری ہے اور وہ یہ کہ پانی میں موجود معدنیات وقت کے ساتھ گیزر کے اندر جمع ہوسکتی ہیں، جس سے اس کی کارکردگی متاثر ہوتی ہے اور پانی گرم ہونے میں پہلے سے زیادہ وقت لگ سکتا ہے۔

اگر گیزر معمول سے زیادہ وقت لے رہا ہو، اس سے غیر معمولی آوازیں آرہی ہوں یا گرم پانی کی فراہمی کم ہوگئی ہو تو مستند ٹیکنیشن سے اس کا معائنہ کروانا چاہیے۔

حفاظت کے لیے گیس کے گیزر کے لیے مناسب ہوا کی آمدورفت بھی انتہائی ضروری ہے۔ گیس جلنے کے نتیجے میں کاربن مونو آکسائیڈ نامی خطرناک گیس پیدا ہوسکتی ہے، جو بند جگہ میں جمع ہوکر جان لیوا ثابت ہوسکتی ہے۔ اس لیے گیس کے گیزر کو مناسب وینٹی لیشن کے بغیر بند جگہ میں استعمال نہیں کرنا چاہیے۔

اگر گیس کی بو محسوس ہو تو ماچس یا لائٹر نہ جلائیں اور بجلی کے سوئچ بھی استعمال نہ کریں۔ فوری طور پر اس جگہ سے باہر نکلیں اور محفوظ مقام سے گیس فراہم کرنے والی کمپنی یا متعلقہ ایمرجنسی سروس سے رابطہ کریں۔

اسی طرح الیکٹرک گیزر کی وائرنگ، ارتھنگ اور حفاظتی نظام کی جانچ بھی مستند الیکٹریشن سے کروانی چاہیے۔

گیزر کا درست سائز منتخب کرنا، مناسب درجہ حرارت برقرار رکھنا، ضرورت کے مطابق استعمال کرنا اور اس کی باقاعدگی سے دیکھ بھال کرنا سردیوں میں توانائی کے اخراجات کم کرنے میں مدد دے سکتا ہے۔ ان چھوٹی چھوٹی احتیاطی تدابیر سے گرم پانی کی سہولت برقرار رکھتے ہوئے گیس، بجلی اور پانی کے غیر ضروری ضیاع سے بھی بچا جاسکتا ہے۔