ثانیہ مرزا نے دوسری شادی اور محبت سے متعلق قیاس آرائیوں پر خاموشی توڑ دی

بھارتی ٹینس اسٹار ثانیہ مرزا کی نجی زندگی ایک بار پھر خبروں میں آگئی ہے۔ انہوں نے سابق پاکستانی کرکٹر شعیب ملک سے علیحدگی کے بعد اپنی نجی زندگی اور نئی محبت سے متعلق قیاس آرائیوں پر خاموشی توڑ دی ہے۔ ایک ٹی وی پروگرام میں انہوں نے بتایا کہ فی الحال ان کی زندگی میں کوئی مرد موجود نہیں۔

ثانیہ مرزا اپنی قریبی دوست اور معروف فلم ساز فرح خان کے ہمراہ بھارتی اداکارہ نیہا دھوپیا اور ان کے شوہر انگد بیدی کے ٹاک شو میں شریک ہوئیں، جہاں میزبانوں کے ساتھ دلچسپ گفتگو کے دوران ان کی نجی زندگی کا موضوع بھی زیر بحث آیا۔

پروگرام میں گفتگو کے دوران میزبانوں نے ثانیہ مرزا سے پوچھا کہ کیا انہیں کسی نے کافی پر ملاقات کی پیشکش کی ہے؟

اس سوال پر سابق ٹینس اسٹار نے بتایا کہ ان کے مرد دوست اکثر انہیں اپنے ساتھ گھومنے پھرنے اور سفر کرنے کی پیشکش کرتے رہتے ہیں، لیکن وہ ان سب کو صرف دوست ہی سمجھتی ہیں۔

اس موقع پر فرح خان نے بھی گفتگو میں حصہ لیتے ہوئے بتایا کہ ان کے بعض دوست اکثر انہیں فون کرکے ثانیہ مرزا کے بارے میں پوچھتے ہیں۔ وہ جاننا چاہتے ہیں کہ کیا ثانیہ واقعی اکیلی ہیں اور ان کی زندگی میں کوئی شخص موجود ہے؟

فرح خان کی اس بات پر ثانیہ مرزا نے اپنی موجودہ صورتحال واضح کرتے ہوئے کہا کہ ان کی زندگی میں کوئی مرد نہیں ہے۔ انہوں نے یہ بھی کہا کہ انہیں خود معلوم نہیں کہ مستقبل میں کوئی ان کی زندگی میں آئے گا یا نہیں۔

ثانیہ مرزا کے اس بیان نے ان کی دوسری شادی اور ممکنہ نئے تعلق سے متعلق جاری قیاس آرائیوں کو ایک بار پھر موضوع بحث بنا دیا ہے۔ گزشتہ کچھ عرصے سے ان کا نام مختلف شخصیات کے ساتھ جوڑا جاتا رہا ہے، حتیٰ کہ بھارتی کرکٹر محمد شامی کے ساتھ ان کی شادی کی خبریں بھی سامنے آئی تھیں، تاہم ان خبروں کی کوئی تصدیق نہیں ہوسکی تھی۔

ثانیہ مرزا اور سابق پاکستانی کرکٹر شعیب ملک کی شادی اپریل 2010 میں ہوئی تھی۔ دونوں کی شادی اس وقت پاکستان اور بھارت سمیت دنیا بھر میں خاصی توجہ کا مرکز بنی تھی۔ اکتوبر 2018 میں ان کے ہاں بیٹے اذہان مرزا ملک کی پیدائش ہوئی۔

کئی سال ساتھ گزارنے کے بعد 2023 میں دونوں کے درمیان علیحدگی ہوگئی اور جنوری 2024 میں شعیب ملک نے اداکارہ ثنا جاوید سے دوسری شادی کا اعلان کیا، جس کے بعد ثانیہ مرزا کے اہل خانہ کی جانب سے بھی بیان سامنے آیا تھا کہ ثانیہ اور شعیب کی علیحدگی ہوچکی ہے اور وہ اپنی زندگی میں آگے بڑھ چکی ہیں۔

علیحدگی کے بعد ثانیہ مرزا نے اپنی ذاتی زندگی کو زیادہ تر میڈیا کی نظروں سے دور رکھا ہے۔ وہ مختلف ٹی وی پروگراموں، تقریبات اور دیگر سرگرمیوں میں نظر آتی رہی ہیں، تاہم اپنی محبت یا مستقبل میں شادی کے حوالے سے انہوں نے اب تک زیادہ بات نہیں کی تھی۔

ذاتی زندگی کے علاوہ ثانیہ مرزا کا اسپورٹس کے حوالے سے کیریئر بھی غیر معمولی کامیابیوں سے بھرپور رہا ہے۔ انہیں بھارت کی کامیاب ترین ٹینس کھلاڑیوں میں شمار کیا جاتا ہے۔ انہوں نے اپنے بین الاقوامی کیریئر کے دوران خواتین کے ڈبلز اور مکسڈ ڈبلز مقابلوں میں مجموعی طور پر 6 گرینڈ سلیم ٹائٹل جیتے۔

ثانیہ مرزا نے جنوری 2023 میں آسٹریلین اوپن کے مکسڈ ڈبلز فائنل میں شرکت کے بعد پیشہ ورانہ ٹینس سے ریٹائرمنٹ کا اعلان کیا تھا۔ ٹینس سے کنارہ کشی کے بعد بھی وہ مختلف شعبوں میں سرگرم ہیں اور ان کی نجی زندگی سے متعلق خبریں بھارتی اور پاکستانی میڈیا میں توجہ حاصل کرتی رہتی ہیں اور ان کے مداح ان کے بارے میں ہر نیوز پر نظر رکھتے ہیں۔