بھارت کو نیوزی لینڈ کے ہاتھوں بدترین شکست، 89 رنز پر پوری ٹیم ڈھیر

نیوزی لینڈ نے چوتھے ون ڈے میچ میں بھارت کو 244 رنز کے بھاری مارجن سے شکست دے دی جب کہ بھارت کی یہ ون ڈے کرکٹ میں رنز کے اعتبار سے دوسری بڑی شکست ہے۔

نیوزی لینڈ کے علاقے بے آف پلینٹی کے شہر تورنگا میں کھیلے گئے میچ میں کیوی ٹیم کی جانب سے ول ینگ نے شاندار سنچری اسکور کرتے ہوئے 108 گیندوں پر 125 رنز بنائے، جبکہ میٹ ہینری نے تباہ کن بولنگ کرتے ہوئے 27 رنز دے کر 6 وکٹیں حاصل کیں۔ ٹم سیفرٹ نے 48 گیندوں پر 58 اور فن ایلن نے 30 گیندوں پر 41 رنز بنا کر ٹیم کا بڑا مجموعہ بنانے میں اہم کردار ادا کیا۔

بھارت نے ٹاس جیت کر نیوزی لینڈ کو پہلے بیٹنگ کی دعوت دی تو میزبان ٹیم کے اوپنرز ول ینگ اور ٹم سیفرٹ نے پراعتماد انداز میں اننگز کا آغاز کیا۔ دونوں بلے بازوں نے تیزی سے رنز بنائے، تاہم گرنور برار، اکشر پٹیل اور عاقب نبی نے وکٹیں حاصل کرکے نیوزی لینڈ کی رفتار روکنے کی کوشش کی۔

اس موقع پر ول ینگ نے ذمہ دارانہ بیٹنگ کا مظاہرہ کیا اور فن ایلن کے ساتھ مل کر اننگز کو سنبھالا۔ دونوں نے اہم رنز جوڑ کر ٹیم کو مضبوط پوزیشن میں پہنچا دیا۔

ان کے علاوہ مچل سینٹنر نے 24، کرسچن کلارک نے 22 اور کائل جیمیسن نے ناقابلِ شکست 19 رنز بنائے۔ نیوزی لینڈ کی پوری ٹیم مقررہ 50 اوورز میں 333 رنز بنا کر آؤٹ ہوگئی اور بھارت کو جیت کے لیے 334 رنز کا ہدف دیا۔

ہدف کے تعاقب میں بھارتی ٹیم کی مشکلات کا آغاز پہلی ہی اوور میں ہوگیا۔ نیوزی لینڈ کے فاسٹ بولر میٹ ہینری نے تباہ کن بولنگ کرتے ہوئے روہت شرما، ویرات کوہلی اور شریاس آئیر کو بغیر کوئی رن بنائے پویلین بھیج دیا، جس کے بعد بھارت کا اسکور تین وکٹوں کے نقصان پر صفر ہوگیا۔

کائل جیمیسن نے بھی بھارتی بیٹنگ پر دباؤ برقرار رکھا اور رتوراج گائیکواڈ کو 5 رنز پر آؤٹ کردیا۔ یوں چھٹے اوور میں بھارت کی چار وکٹیں صرف 9 رنز پر گر چکی تھیں۔

اس مشکل صورتِ حال میں ایشان کشن اور اکشر پٹیل نے اننگز کو سنبھالنے کی کوشش کی اور دونوں کے درمیان 44 رنز کی شراکت قائم ہوئی، تاہم کیوی بولر میتھیو فشر نے اکشر پٹیل کو آؤٹ کرکے اس شراکت کا خاتمہ کردیا۔

اس کے بعد بھارتی بیٹنگ لائن ایک مرتبہ پھر لڑکھڑا گئی۔ میٹ ہینری نے دوبارہ بولنگ کرتے ہوئے ایشان کشن، کلدیپ یادیو اور گرنور برار کو بھی پویلین بھیج دیا۔ ہینری نے مجموعی طور پر 27 رنز دے کر 6 وکٹیں حاصل کیں، جو ان کے ون ڈے کیریئر کی بہترین بولنگ ہے۔

نیوزی لینڈ کے بولرز کے سامنے بھارتی ٹیم 26.4 اوورز میں محض 89 رنز بنا کر آؤٹ ہوگئی اور اسے 244 رنز کی بھاری شکست کا سامنا کرنا پڑا۔

اس کامیابی کے بعد نیوزی لینڈ نے پانچ میچوں کی ون ڈے سیریز میں بھارت کی برتری 1-2 کردی ہے۔ سیریز کا آخری میچ اتوار کو کھیلا جائے گا، جس میں نیوزی لینڈ کی ٹیم سیریز برابر کرنے جبکہ بھارت اپنی برتری برقرار رکھنے کے لیے میدان میں اترے گا۔