ایرانی وزیر خارجہ عباس عراقچی پاکستان پہنچ گئے، کیا مصروفیات ہوں گی؟

ایران کے وزیر خارجہ عباس عراقچی اقتصادی تعاون تنظیم (ایکو) کے وزرائے خارجہ کونسل کے اہم اجلاس میں شرکت کے لیے پاکستان پہنچ گئے ہیں۔

آج اسلام آباد میں منعقد ہونے والے اس علاقائی اجلاس میں تنظیم کے رکن ممالک کے وزرائے خارجہ اور اعلیٰ سطح کے وفود شریک ہو رہے ہیں، تاہم سفارتی ذرائع کے مطابق اس اجلاس میں شرکت کے لیے افغان طالبان حکومت کو مدعو نہیں کیا گیا ہے۔

اجلاس کی باقاعدہ نشستوں کا آغاز آج پیر کی صبح ہو رہا ہے، جس کا افتتاحی خطاب پاکستان کے نائب وزیراعظم اور وزیر خارجہ سینیٹر اسحاق ڈار کریں گے، جبکہ اقتصادی تعاون تنظیم کے سیکرٹری جنرل ڈاکٹر اسد مجید خان کا خطاب بھی شیڈول کا حصہ ہے۔

اس علاقائی فورم کے دوران ایران اور وسط ایشیائی ریاستوں سمیت تمام رکن ممالک کے نمائندے باہمی تجارت کے فروغ، علاقائی روابط میں اضافے، اقتصادی تعاون کے نئے مواقع اور خطے کو درپیش مشترکہ چیلنجز پر تفصیلی تبادلہ خیال کریں گے۔

وفاقی دارالحکومت روانگی سے قبل ایرانی وزیر خارجہ عباس عراقچی نے لاہور میں ایران کے نو تعینات قونصل جنرل ابراہیم محمدی سے ملاقات کی۔

دورہ پاکستان کے دوران عباس عراقچی کی پاکستانی قیادت سے الگ دوطرفہ ملاقاتیں بھی متوقع ہیں، جن میں وہ وزیراعظم شہباز شریف اور نائب وزیراعظم اسحاق ڈار سے ملاقات کریں گے۔

اطلاعات کے مطابق ان ملاقاتوں میں پاک ایران باہمی تجارت، توانائی کے شعبے میں تعاون، علاقائی سلامتی اور مشرق وسطیٰ کی بدلتی ہوئی صورتحال پر مشاورت کی جائے گی۔

دوسری جانب وزیراعظم شہباز شریف اجلاس میں شریک مہمان وزرائے خارجہ سے ملاقات کریں گے اور ان کے اعزاز میں ظہرانہ بھی دیں گے، جس سے رکن ممالک کے درمیان سفارتی روابط کو مزید تقویت ملنے کی توقع ہے۔

ایرانی وزیر خارجہ اپنا دورہ پاکستان مکمل کرنے کے بعد منگل کو عمان روانہ ہوں گے، جہاں وہ اپنے عمانی ہم منصب سے ملاقات کر کے خطے کی مجموعی صورتحال پر تبادلہ خیال کریں گے۔

پاکستان کی جانب سے اس اجلاس کی میزبانی ایک ایسے وقت میں کی جا رہی ہے جب خطے کے ممالک اقتصادی شراکت داری کو مضبوط بنانے اور سرحد پار تجارت کو وسعت دینے کے لیے کوشاں ہیں۔

اقتصادی تعاون تنظیم جنوبی ایشیا، وسط ایشیا اور مشرق وسطیٰ کے ممالک کو ایک مشترکہ پلیٹ فارم فراہم کرتی ہے تاکہ ترقیاتی اہداف کے حصول کے لیے پالیسیوں کو ہم آہنگ بنایا جا سکے۔

اجلاس کے اختتام پر رکن ممالک کے درمیان علاقائی تعاون اور معاشی روابط کے فروغ کے حوالے سے آئندہ کے لائحہ عمل کا اعلان متوقع ہے۔

Related posts