راولاکوٹ میں مسلح افراد کی فائرنگ سے رینجرز کے ڈپٹی سپرنٹنڈنٹ شہید، جوابی کارروائی میں 4 حملہ آور ہلاک
آزاد کشمیر کے شہر راولاکوٹ میں قانون نافذ کرنے والے اہلکاروں پر مسلح افراد کی فائرنگ کے نتیجے میں پاکستان رینجرز کے ڈپٹی سپرنٹنڈنٹ برکت علی شہید ہو گئے، جبکہ سیکیورٹی فورسز کی جوابی کارروائی میں 4 مسلح حملہ آور بھی مارے گئے ہیں۔
یہ واقعہ منگل کی صبح تقریباً 10 بج کر 30 منٹ پر راولاکوٹ کے علاقے متیالمیرا بس ٹرمینل کے قریب پیش آیا جہاں سیکیورٹی اہلکار اپنے فرائض انجام دے رہے تھے۔
مقامی ذرائع کے مطابق مسلح افراد نے متیالمیرا بس ٹرمینل کے نزدیک تعینات اہلکاروں کو اچانک فائرنگ کا نشانہ بنایا، جس کے دوران ایک گولی رینجرز کے ڈپٹی سپرنٹنڈنٹ برکت کے سر پر لگی۔
واقعے کے فوری بعد انہیں شدید زخمی حالت میں کمبائنڈ ملٹری ہسپتال یعنی سی ایم ایچ راولاکوٹ منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔
فائرنگ کے دوران قانون نافذ کرنے والے اداروں نے فوری طور پر جوابی کارروائی کی جس کے نتیجے میں 4 مسلح افراد ہلاک ہو گئے۔
واقعے کے بعد راولاکوٹ شہر اور اس کے گردونواح میں سیکیورٹی انتظامات انتہائی سخت کر دیے گئے ہیں اور صورتحال پر مکمل قابو پانے کے لیے علاقے میں سرچ اور کلیئرنس آپریشن جاری ہے۔
حکام کے مؤقف کے مطابق مسلح عناصر علاقے میں تشدد، خوف و ہراس پھیلانے اور امن و امان کی بحالی میں رکاوٹ ڈالنے کی کوشش کر رہے ہیں۔
سرکاری ذرائع کا کہنا ہے کہ شہریوں کے تحفظ اور شہر میں معمولات زندگی بحال رکھنے کے لیے قانون نافذ کرنے والے اہلکار متحرک ہیں، اور متیالمیرا فائرنگ سمیت سیکیورٹی اہلکاروں پر حملوں میں ملوث تمام افراد اور مسلح گروہوں کو قانون کے کٹہرے میں لانے کے لیے کارروائیاں جاری رہیں گی۔