تمام ادارے تباہ کروائے گئے، ری سیٹ غیر سیاسی نہیں سیاسی ہونا چاہئے: بلاول بھٹو
بلاول بھٹو زرداری نے کہا ہے کہ اس میں کوئی شک نہیں کہ نظام تباہ ہو چکا ہے لیکن اس بات پر بحث نہیں ہوتی کہ آخر یہ نظام تباہ کیوں ہوا جب کہ نظام کی بہتری کے لیے درکار ری سیٹ غیر سیاسی نہیں بلکہ سیاسی ہونا چاہیے۔
کراچی پریس کلب میں ’میٹ دی پریس‘ سے خطاب کرتے ہوئے بلاول بھٹو زرداری نے کہا کہ صحافی ملک کی اصل طاقت ہیں، قلم کی طاقت سے کوئی انکار نہیں کر سکتا، اسی طاقت کے ذریعے حکومتیں بنتی اور ٹوٹتی ہیں۔
بلاول بھٹو نے کہا کہ عالمی حالات کے باعث عوام مشکل دور سے گزر رہے ہیں، معاشی بحران روز بروز بڑھتا جا رہا ہے، یہ تشویش ناک صورت حال ہے۔
انہوں نے کہا کہ سیاست دان عوام کے مسائل بھول چکے ہیں۔ وہ ہر معاملے پر بات کرنے کو تیار ہیں لیکن مہنگائی، بے روزگاری اور عام آدمی کی مشکلات ان کی ترجیحات میں شامل نہیں ہیں۔
چیئرمین پیپلز پارٹی نے نئے صوبوں کے حوالے سے جاری بحث پر ردعمل دیتے ہوئے کہا کہ لاہور سے یہ بات ہوئی کہ نظام تباہ ہو چکا ہے۔
انہوں نے کہا کہ ’اس میں کوئی شک نہیں کہ نظام تباہ ہو چکا ہے لیکن اس بات پر بحث نہیں ہوتی کہ آخر یہ نظام تباہ کیوں ہوا۔‘
انہوں نے کہا کہ نظام کی بہتری کے لیے جو علاج تجویز کیا جا رہا ہے، وہ مسئلے کا حل نہیں ہے۔ مہنگائی اور بے روزگاری سے نمٹنے کے لیے سنجیدگی سے سوچنا ہوگا۔
بلاول بھٹو زرداری کا کہنا تھا کہ ملک کو درکار ری سیٹ غیر سیاسی نہیں بلکہ سیاسی ہونا چاہیے۔ انہوں نے مزید کہا کہ اداروں پر عوام کا اعتماد بحال کرنا ہوگا۔
نوٹ: یہ ابتدائی خبر ہے مزید تفصیلات شامل کی جارہی ہیں۔