جے ڈی وینس نے امریکا میں پروازوں کا نظام بند ہونے کا ذمے دار ڈیموکریٹس کو قرار دے دیا
امریکا میں فضائی ٹریفک کنٹرول کے نظام میں خرابی کے باعث ہزاروں پروازیں متاثر ہونے کے معاملے پر سیاسی الزام تراشی شروع ہوگئی ہے۔ نائب صدر جے ڈی وینس نے اس صورت حال کا ذمہ دار ڈیموکریٹس کو قرار دیا ہے۔
برطانوی اخبار ’دی گارجین‘ کے مطابق امریکی نائب صدر جے ڈی وینس نے الزام لگایا ہے کہ ڈیموکریٹس خواتین کے کھیلوں میں مردوں کی شرکت کے معاملے پر غیر ضروری توجہ دینے کے بجائے فضائی ٹریفک کنٹرول کے نظام کو جدید بنانے پر توجہ دیں تو اس مسئلے کو حل کرنے میں مدد مل سکتی ہے۔
جے ڈی وینس نے پیر کو ’فاکس نیوز‘ کو انٹرویو دیتے ہوئے کہا کہ ان کی حکومت فضائی ٹریفک کنٹرول کے نظام میں موجود خرابیوں کو دور کرنے کے لیے کام کر رہی تھی، تاہم جدید ٹیکنالوجی کے ذریعے پورے نظام کو بہتر بنانے کے لیے کانگریس کی جانب سے مزید وسائل درکار ہیں۔
انہوں نے کہا کہ ڈیموکریٹس کے ساتھ مل کر بھی یہ کام کیا جاسکتا ہے، بشرطیکہ وہ خواتین کے کھیلوں میں مردوں کی شرکت کے معاملے پر اپنی توجہ کم کریں اور مہنگائی میں کمی اور بنیادی ڈھانچے کی بہتری پر توجہ دیں۔
یہ بیان ایسے وقت میں سامنے آیا ہے جب گزشتہ جمعے کو امریکا بھر میں تقریباً چار گھنٹے تک پروازوں کا نظام معطل رہا تھا۔ اس کے نتیجے میں ہزاروں پروازیں تاخیر کا شکار ہوئیں یا منسوخ کردی گئیں، جس سے مسافروں کو شدید مشکلات کا سامنا کرنا پڑا۔
ابتدائی اطلاعات کے مطابق پروازوں کا نظام متاثر ہونے کی وجہ پرانے تانبے کی تاروں پر چلنے والے مواصلاتی نظام کو فائبر آپٹک کیبل میں تبدیل کرنے کا عمل تھا۔ اس واقعے کے بعد امریکی سیاست دانوں اور حکومتی عہدیداروں کے درمیان ذمہ داری کے تعین پر بحث شروع ہوگئی ہے۔
جے ڈی وینس کے بیان پر ڈیموکریٹک رہنماؤں اور دیگر شخصیات نے تنقید کی۔ ڈیموکریٹک پارٹی سے تعلق رکھنے والے نو منتخب رکن کانگریس فریڈ ویل مین نے سوشل میڈیا پلیٹ فارم ’ایکس‘ پر سوال اٹھایا کہ وینس کس بارے میں بات کر رہے ہیں۔
صحافی جمیلے ہل نے بھی تنقید کرتے ہوئے کہا کہ ہر مسئلے کو خواجہ سراؤں کے معاملے سے جوڑنے کا مشورہ دینے والے مشیر محض پیسے برباد کر رہے ہیں۔ ان کے مطابق اس معاملے پر سب سے زیادہ توجہ خود جے ڈی وینس دے رہے ہیں۔
امریکی صدر ڈونلڈ ٹرمپ نے بھی پروازوں کی معطلی اور اس کے نتیجے میں پیدا ہونے والی سفری مشکلات کو معمولی قرار دیتے ہوئے منگل کو صحافیوں سے کہا کہ جب آپ بڑے، طاقت ور اور دولت مند ہوتے ہیں تو اس طرح کے واقعات پیش آتے رہتے ہیں۔
دوسری جانب امریکی وزیر ٹرانسپورٹ شان ڈفی نے بھی پروازوں کے نظام میں خرابی کا ذمہ دار سابق صدر جو بائیڈن کی انتظامیہ کی ترجیحات کو قرار دیا۔ ’فاکس نیوز‘ کو انٹرویو میں ان کا کہنا تھا کہ سابق حکومت نے فضائی نظام کے بنیادی ڈھانچے کے بجائے ہوا بازی سے متعلق اصطلاحات تبدیل کرنے پر توجہ دی۔
تاہم رپورٹ کے مطابق بائیڈن انتظامیہ نے اپنے بنیادی ڈھانچے کے قانون کے تحت فضائی ٹریفک کنٹرول کے نظام کو جدید بنانے کے لیے 25 ارب ڈالر مختص کیے تھے۔ اس کے علاوہ کانگریس نے حال ہی میں امریکی فیڈرل ایوی ایشن ایڈمنسٹریشن (ایف اے اے) کے نظام کو جدید بنانے کے لیے مزید 12 ارب 50 کروڑ ڈالر کی رقم بھی مختص کی۔
ریاست میری لینڈ سے تعلق رکھنے والے ڈیموکریٹ سینیٹر کرس وان ہولن نے کہا کہ انتظامیہ کو مختص کی گئی رقم کا صرف ایک تہائی حصہ خرچ کیا گیا ہے۔ ان کے مطابق اگر حکومت کو مزید فنڈز درکار ہیں تو اسے کانگریس کے سامنے اس کی ضرورت اور جواز پیش کرنا چاہیے۔