راولپنڈی ٹیسٹ میں سری لنکا اننگز کی شکست سے بچ گیا، 9 وکٹوں پر 309 رنز بنالیے
راولپنڈی میں کھیلے جارہے دوسرے ٹیسٹ میں سری لنکن ٹیم اننگز کی شکست سے بچنے میں کامیاب ہوگئی، تیسرے روز کھیل کے اختتام پر سری لنکا نے سری لنکا نے شاندار کم بیک کرتے ہوئے 9 وکٹوں کے نقصان پر 309 رنز بنالیے اور پاکستان کے خلاف 82 رنز کی برتری حاصل کرلی ہے۔
راولپنڈی میں پاکستان اور سری لنکا کے درمیان کھیلے جارہے دوسرے ٹیسٹ میچ میں مہمان ٹیم نے تیسرے روز بھرپور مزاحمت کرتے ہوئے اننگز کی شکست کا خطرہ ٹال دیا۔
سری لنکا نے تیسرے روز اپنی دوسری اننگز کا آغاز 3 وکٹوں کے نقصان پر 74 رنز سے کیا تو 99 کے مجموعی اسکور پر دھننجیا ڈی سلوا 37 رنز بنا کر آؤٹ ہوگئے۔ اس کے بعد 134 کے مجموعی اسکور پر پاسندو سوریا بندارا غیر ضروری شاٹ کھیلنے کی کوشش میں 38 رنز بنا کر پویلین لوٹ گئے۔
کھانے کے وقفے کے بعد سونل دینوشا اور کپتان کوشل مینڈس نے ذمہ دارانہ بیٹنگ کرتے ہوئے اننگز کو آگے بڑھایا اور دونوں کے درمیان 81 رنز کی اہم شراکت قائم ہوئی تاہم کپتان کوشل مینڈس 53 رنز بنا کر آؤٹ ہوئے۔
چائے کے وقفے کے بعد سری لنکا کو مزید نقصان اٹھانا پڑا اور سونل دینوشا 54 رنز بنا کر پویلین واپس لوٹ گئے۔ پرباتھ جے سوریا ایک رن جب کہ لاہیرو کمارا 5 رنز بنا سکے۔
تیسرے روز کھیل کے اختتام پر سری لنکا نے 9 وکٹوں کے نقصان پر 309 رنز بنالیے ہیں۔ ملن رتھنائیکے 60 اور اسیتھا فرنانڈو 2 رنز کے ساتھ کریز پر موجود ہیں۔
سری لنکا کو پاکستان کے خلاف مجموعی طور پر 82 رنز کی برتری حاصل ہوگئی ہے جب کہ ٹیسٹ میچ کے مزید 2 روز کا کھیل باقی ہے۔
پاکستان کی جانب سے عامر جمال نے 3 وکٹیں حاصل کیں، رضا اللہ اور محمد عباس نے 2، 2 کھلاڑیوں کو آؤٹ کیا جب کہ ثاقب خان اور سلمان علی آغا نے ایک، ایک وکٹ حاصل کی۔
پاکستانی فاسٹ بولر ثاقب خان وکٹ حاصل کرنے کے فوراً بعد ہیمسٹرنگ انجری کا شکار ہوگئے تھے اور اسی وجہ سے وہ سری لنکا کی دوسری اننگز میں مزید بولنگ کے لیے دستیاب نہیں ہیں۔
پاکستان کی پہلی اننگز
اس سے قبل پاکستان کی ٹیم سری لنکا کے پہلی اننگز کے 98 رنز کے جواب میں 325 رنز بنا کر آؤٹ ہوگئی تھی۔ پاکستان نے پہلی اننگز میں 227 رنز کی برتری حاصل کی تھی۔
پاکستان کی جانب سے غازی غوری 54 رنز بنا کر نمایاں رہے، اذان اویس نے 47، طیب عارف نے 46 اور رضا اللہ نے 42 رنز اسکور کیے۔
سری لنکا کی جانب سے لاہیرو کمارا نے شاندار بولنگ کرتے ہوئے 5 وکٹیں حاصل کیں، اسیتھا فرنانڈو نے 3 جب کہ ملن رتھنائیکے اور پرباتھ جے سوریا نے ایک، ایک کھلاڑی کو آؤٹ کیا۔
اب ٹیسٹ میچ کے آخری دو روز باقی ہیں اور سری لنکا کو پاکستان کے خلاف 82 رنز کی برتری حاصل ہے۔