وزیراعظم اور صدر کے درمیان اہم ملاقات، تمام معاملات بات چیت سے حل کرنے پر اتفاق
وزیراعظم شہباز شریف اور صدر مملکت آصف علی زرداری کے درمیان ملاقات میں ملک کی موجودہ سیاسی صورتحال اور مشرق وسطیٰ کے حالات کا تفصیلی جائزہ لیا گیا۔
ایوانِ صدر کے سوشل میڈیا پلیٹ فارم ’ایکس‘ پر جاری بیان کے مطابق وزیراعظم شہباز شریف اور صدر مملکت آصف علی زرداری کے درمیان ملاقات ہوئی، جس میں ملک کی موجودہ سیاسی صورتحال اور مشرق وسطیٰ کے حالات پر تفصیلی تبادلہ خیال کیا گیا۔
ملاقات میں اس بات پر اتفاق کیا گیا کہ تمام معاملات بات چیت کے ذریعے حل کیے جائیں گے۔ اس مقصد کے لیے تمام امور پر مل بیٹھ کر مشاورت کرنے اور باہمی اتفاق رائے سے حل نکالنے کا فیصلہ کیا گیا۔
ملاقات کے دوران سابقہ آئینی ترامیم کا بھی ذکر کیا گیا۔ اس موقع پر کہا گیا کہ یہ ترامیم تمام اتحادی جماعتوں کی باہمی مشاورت سے کی گئی تھیں۔
یہ ملاقات ایسے وقت میں ہوئی ہے جب وزیر داخلہ محسن نقوی نے ملک میں نئے صوبے بنانے کے لیے ریفرنڈم کی بات کی تھی، جس پر پاکستان پیپلز پارٹی کے چیئرمین بلاول بھٹو نے ردِ عمل دیا۔
ایوانِ صدر کی جانب سے جاری کردہ تصویر میں وزیر داخلہ محسن نقوی بھی وزیراعظم شہباز شریف اور صدر مملکت آصف علی زرداری کی ملاقات میں شریک نظر آ رہے ہیں۔