صدر زرداری اور بلاول بھٹو کے درمیان بات ہوچکی؛ صوبوں کا حل نکل آئے گا: گورنر خیبر پختونخوا
گورنر خیبر پختونخوا فیصل کریم کنڈی نے کہا ہے کہ نئے صوبوں کے معاملے پر صدر آصف علی زرداری اور بلاول بھٹو زرداری کی بھی ملاقات ہو چکی ہے۔ ہر معاملے کو آئینی دائرے میں دیکھا جائے گا، کوئی سیاسی انتقام نہیں ہو گا کیونکہ معاملات کو بیٹھ کر حل کیا جا سکتا ہے۔
صوابی میں ڈسٹرکٹ ہیڈ کوارٹر اسپتال کے 113 بستروں پر مشتمل نئے بلاک کی افتتاحی تقریب سے خطاب کرتے ہوئے گورنر خیبرپختونخوا نے کہا کہ صوبے میں امن و امان کا قیام اور مسائل کو درست کرنا اولین ترجیح ہے۔
گورنر خیبر پختونخوا نے مطالبہ کیا کہ صحت کے شعبے کے لیے درکار فنڈز فراہم کیے جائیں گے تاکہ شہریوں کو علاج کے لیے دوسرے صوبوں یا شہروں کا سفر نہ کرنا پڑے۔
فیصل کریم کنڈی نے کہا کہ اسپتالوں کو جدید طبی سہولیات سے آراستہ کیا جا رہا ہے اور کوشش ہے کہ خیبرپختونخوا کے عوام کو اپنے ہی صوبے میں معیاری علاج میسر آئے۔
انہوں نے کہا کہ کسی بھی عوامی منصوبے کی اصل کامیابی اس وقت ہوتی ہے جب اس کے فوائد براہ راست عام شہری تک پہنچیں، اور صوابی اسپتال کا نیا بلاک مریضوں کے دباؤ کو کم کرنے میں مددگار ثابت ہو گا۔
فیصل کریم کنڈی نے بتایا کہ ضلع صوابی کی آبادی تقریباً 19 لاکھ ہے اور ڈسٹرکٹ ہیڈ کوارٹر اسپتال، باچا خان میڈیکل کمپلیکس، تحصیل اور بنیادی مراکز صحت عوام کو سہولیات فراہم کر رہے ہیں، تاہم بڑھتی ہوئی آبادی کے پیش نظر مزید بہتری کی ضرورت ہے۔
گورنر کے مطابق 2017 میں شروع ہونے والا یہ منصوبہ بروقت مکمل نہیں ہو سکا تھا، تاہم اب نامکمل ترقیاتی منصوبوں کی فوری تکمیل کے لیے اقدامات کیے جا رہے ہیں، اور اس منصوبے کی تکمیل میں کمشنر مردان ڈویژن، ضلعی انتظامیہ اور متعلقہ اداروں نے کردار ادا کیا۔
انہوں نے کہا کہ عمارت کی تعمیر کے ساتھ ڈاکٹروں اور طبی عملے کی مناسب تعداد، ادویات، طبی آلات، صفائی اور شکایات کے ازالے کو یقینی بنایا جانا چاہیے، جبکہ مشیر صحت کے تجربے سے بھرپور استفادہ کیا جائے گا۔
فیصل کریم کنڈی نے مزید کہا کہ اسپتال کی کارکردگی کا جائزہ عمارت اور آلات کے بجائے علاج کے معیار اور باقاعدہ نگرانی کے ذریعے لیا جائے گا۔
ملکی اور بین الصوبائی امور پر بات کرتے ہوئے فیصل کریم کنڈی نے کہا کہ موجودہ صورتحال پر صدر اور وزیراعظم کے درمیان ملاقات ہوئی ہے جبکہ صدر آصف علی زرداری اور بلاول بھٹو زرداری کی بھی ملاقات ہو چکی ہے۔
انہوں نے کہا کہ ہر معاملے کو آئینی دائرے میں دیکھا جائے گا، کوئی سیاسی انتقام نہیں ہو گا اور معاملات کو بیٹھ کر حل کیا جا سکتا ہے۔
گورنر کے مطابق ماضی میں نہروں پر پنجاب اور سندھ کے درمیان مسئلہ درپیش تھا جو فورم پر حل ہوا، اور اب صوبوں سے متعلق معاملے پر بھی بات چیت جاری ہے جس کا حل نکل آئے گا۔
تقریب سے خطاب کرتے ہوئے مشیر صحت نگار جوہر نے کہا کہ 10 سال بعد ڈسٹرکٹ ہیڈ کوارٹر اسپتال کا نیا بلاک تعمیر کیا گیا ہے۔
صوابی میں نئے بلاک کے افتتاح کے بعد اسپتال انتظامیہ اور متعلقہ حکام کی جانب سے طبی عملے، آلات اور سہولیات کی فراہمی و نگرانی سے متعلق اقدامات کو آگے بڑھائے جانے کا سلسلہ جاری رہے گا۔