کراچی میں گزشتہ رات سائٹ ایریا غنی چورنگی کے قریب ایک افسوسناک ٹریفک حادثہ پیش آیا، جس میں تیز رفتار ٹرالر نے موٹر سائیکل سوار دو افراد کو کچل دیا۔ حادثے کے نتیجے میں ایک شخص جاں بحق ہو گیا جبکہ دوسرا زخمی ہوا۔
ریسکیو ذرائع کے مطابق جاں بحق ہونے والے شخص کی شناخت 24 سالہ سمیرعالم کے نام سے ہوئی ہے، جو ایک طالب علم تھا اور کام سے سائٹ ایریا آیا تھا۔ حادثے میں زخمی ہونے والے عزیر کی حالت خطرے سے باہر بتائی جا رہی ہے۔
لواحقین کے مطابق دونوں افراد کل کسی کام سے حب چوکی سے سائٹ ایریا آ رہے تھے، جب یہ دردناک حادثہ پیش آیا۔ حادثے کے بعد ٹرالر موقع سے فرار ہو گیا.
کراچی میں رواں سال کے دوران ٹریفک حادثات میں جاں بحق ہونے والے افراد کی تعداد 297 تک پہنچ چکی ہے۔ ریسکیو ذرائع کے مطابق ان حادثات میں ہیوی ٹریفک کی وجہ سے 95 افراد کی زندگیوں کا چراغ گل ہوا، جن میں زیادہ تر مرد ہیں۔ جاں بحق افراد میں خواتین کی تعداد 27 اور بچوں کی تعداد 40 ہے۔ مختلف ٹریفک حادثات میں زخمی ہونے والوں کی تعداد 4 ہزار سے تجاوز کر چکی ہے۔