امریکہ کے معروف اور طویل عرصے سے نشر ہونے والے کارٹون ’دی سمپسنز‘ سمیت کئی کامیاب شوز کے پیچھے تخلیقی ذہن رکھنے والے اسٹیو پیپون، 68 برس کی عمر میں انتقال کر گئے۔ ان کی اہلیہ میری اسٹیفنسن نے ان کے انتقال کی تصدیق کرتے ہوئے بتایا کہ پیپون دل کی ایک بیماری ’کارڈیک ایمائیلوئیڈوسس‘ میں مبتلا تھے اور کافی عرصے سے اس کا علاج جاری تھا۔ وہ اچانک اپنے گھر کے باہر گر کر انتقال کر گئے۔
پیپون کی زندگی ایک ایسی کہانی ہے جو ثابت کرتی ہے کہ خواب دیکھنے والا کوئی بھی شخص اپنی منزل تک پہنچ سکتا ہے۔ کنساس میں ایک جوتوں کی دکان سے اپنے کیریئر کا آغاز کرنے والے پیپون 1979 میں لاس اینجلس منتقل ہوئے۔ یہاں ان کی تخلیقی صلاحیتوں نے جلد ہی ٹی وی انڈسٹری کی توجہ حاصل کی۔ 1985 میں ان کی پہلی اسکرپٹ نے NBC کے شو ’سلور سپونز‘ کا حصہ بن کر انہیں مصنفین کی دنیا میں شناخت دلائی۔
لاس اینجلس میں لگی بھیانک آگ کی پیشگوئی سمپسن پہلے ہی کرچکا تھا؟
’دی سمپسنز‘ میں قلم کی دھاک
1989 میں جب انہوں نے ’دی سمپسنز‘ کے لیے لکھنا شروع کیا تو ان کی تحریری مہارت نے شو میں نئی جان ڈال دی۔ 1991 میں ان کی لکھی گئی مشہور قسط ”Homer vs. Lisa and the 8th Commandment“ کو ایمی ایوارڈ سے نوازا گیا۔ یہ قسط ٹی وی دیکھنے کے اخلاقی اور مذہبی پہلوؤں کو طنز و مزاح کے انداز میں پیش کرنے کی ایک نایاب مثال تھی۔
پیشگوئیاں یا محض اتفاق؟
پیپون کا نام ’دی سمپسنز‘ کی ان قسطوں سے بھی جڑا ہے جو اپنے وقت سے آگے کی باتیں کرتی نظر آئیں۔ 9/11 حملے، فیفا میں کرپشن، کورونا جیسی وبا، خلائی سیاحت اور برطانیہ کی ملکہ الزبتھ دوم کے انتقال جیسی بڑی عالمی تبدیلیوں کی ’پیش گوئیاں‘ اس کارٹون میں برسوں قبل دیکھی جا چکی تھیں۔
ڈونلڈ ٹرمپ پر حملے سے متعلق ’سمپسن کارٹون‘ کی پیشگوئی
دیگر تخلیقی منصوبے اور کامیابیاں
پیپون کی قلمکاری صرف ’دی سمپسنز‘ تک محدود نہ رہی۔ وہ ABC کے ہٹ سٹکام ’روزین‘ کے مصنفین میں شامل رہے، اور 1990 کی دہائی میں انہوں نے ’دی جیکی تھامس شو‘ میں بطور لیڈ رائٹر خدمات انجام دیں۔ ان کا تخلیقی سفر 1998 میں مزید رنگ لے آیا جب انہوں نے بچوں کی مشہور اینی میٹڈ سیریز ’دی وائلڈ تھورن بیریز‘ تخلیق کی، جو پانچ سیزنز تک کامیابی سے چلی۔ یہ شو قدرتی حیات، خاندانی تعلقات اور مہم جوئی کے امتزاج سے ایک منفرد تفریح فراہم کرتا رہا۔
سمپسن کی ایک اور پیشگوئی پوری؟
اسٹیو پیپون نے اپنے قلم سے نہ صرف ناظرین کو ہنسانے کا کام کیا بلکہ معاشرتی اور اخلاقی پہلوؤں پر بھی سوال اٹھائے۔ ان کی تحریروں میں طنز، حساسیت، اور زندگی کے سنجیدہ سوالات کا امتزاج موجود تھا۔