وزیر دفاع خواجہ آصف کا کہنا ہے کہ پانسہ پلٹ گیا، مودی کا گیم ختم ہوگیا، مودی بڑھکیں مارکر اپنی سیاسی ساکھ نہیں بچا سکتا، یہ سائبر وار فیئر تاریخ کی پہلی لڑائی ہے، بھارت کی جانب سے کوئی بھی صورتحال پیدا ہوئی تو کاری ضرب لگائیں گے۔
نجی ٹی وی سے گفتگو کرتے ہوئے وزیر دفاع خوجہ آصف نے کہا کہ سائبر وار فیئر تاریخ کی پہلی لڑائی ہے، ہمارے فوجیوں نے انڈینز کے ’پھٹے چک دیے‘، اس جنگ سے چینی ہارڈویئر کی بھی فتح ہوئی ہے، ہمارے بچوں کی ویلیو ایڈیشن سے بھی دنیا کو انگُشت بَہ دَنداں ہے، کل تک جو پاکستان کو سنجیدہ نہیں لے رہے تھے آج احترام کررہے ہیں۔
خواجہ آصف نے کہا کہ مودی کا گیم ختم ہوگیا ہے، پانسہ پلٹ گیا، مودی کا سیاسی کیریئرختم ہوگیا، مودی بڑھکیں مارکراپنی سیاسی ساکھ نہیں بچاسکتا، بندہ جب بوکھلایا ہوا ہوتا ہے تو جواری بھی ہوجاتا ہے، وزیردفاع
وزیردفاع کا کہنا تھا کہ بھارت کی جانب سے خدشہ لازمی رہے گا، اگر کوئی بھی صورتحال پیدا ہوتی ہے، مودی خود تو بھگتے گا، بھارت کو بھی کاری ضرب لگوائے گا۔
انہوں نے کہا کہ جنگ دراصل سائبر فرنٹ پر لڑی گئی ہے، چین بھی ہماری کارکردگی پر عش عش کراٹھا ہے، ہم نے پورے بھارت کو جام کردیا تھا، ہم نے بھارت کا سب کچھ بند کردیا تھا۔
واضح رہے کہ 10 مئی کو پاکستان کی جانب سے بھارت کو دیے گئے منہ توڑ جواب کے بعد امریکی صدر ڈونلڈ ٹرمپ کی ثالثی میں دونوں ملکوں کے درمیان سیز فائر ہوگیا ہے۔
گزشتہ روز سعودی عرب میں خطاب کرتے ہوئے ڈونلڈ ٹرمپ نے کہا تھا کہ میں چاہوں گا پاکستان اور بھارت کے رہنما ایک ساتھ ڈنر کریں، وہ جنگ کے بجائے آپس میں تجارت کریں۔