پاکستان میں سائبر کرائم عالمی نیٹ ورک پکڑا گیا، لیپ ٹاپس، موبائلز، ڈیٹا اسٹوریج ڈیوائسز برآمد

نیشنل سائبر کرائم انویسٹیگیشن ایجنسی ملتان نے کارروائی کرتے ہوئے پاکستان سے چلنے والا عالمی سائبر کرائم نیٹ ورک پکڑ لیا گیا، درجنوں ویب سائٹس بلاک کر دی گئیں، ملزمان کے قبضے سے موبائل فونز، لیپ ٹاپس اور ڈیٹا اسٹوریج ڈیوائسز برآمد کرتے ہوئے 21 رکنی گروہ کے 8 ارکان ملتان سے اور6 ارکان کو لاہور سے گرفتار کیا گیا۔

این سی سی اے ملتان کے مطابق حساس اداروں اور نیشنل سائبر کرائم انویسٹیگیشن ایجنسی ملتان کی جانب سے کی جانی والی کارروائی کے دوران پاکستان سے چلنے والا عالمی سائبر کرائم نیٹ ورک پکڑ لیاگیا ہے۔ درجنوں ویب سائٹس بلاک جبکہ ٹیم نے اکیس رکنی گروہ کے چودہ ارکان کو پکڑلیا۔

ملزم رمیز شہزاد امریکیوں اور غیر ملکیوں سے کروڑوں ڈالر کے فراڈ میں ملوث پایا گیا، رمیز شہزاد نے لاہور اور ملتان میں میں نیٹ ورک بنا رکھا تھا، لاہور میں گروہ کے چار گھروں پر چھاپے مارے گئے جہاں بڑی مقدار میں ڈیجیٹل مواد برآمد کرلیا گیا۔

گرفتار ملزمان میں محمد اسلم،عدیل عزیز،اسامہ نواز،عبدالمعیز اور شعیب نذیر سمیت دیگر ملزمان شامل ہیں، ملزمان کے قبضے سے موبائل فونز، لیپ ٹاپس اور ڈیٹا اسٹوریج ڈیوائسز بھی برآمد کرلی گئیں۔

ملزمان کیخلاف پیکا اور تعزیراتِ پاکستان کی متعدد دفعات کے تحت مقدمہ درج کیا گیا، ملزم رمیز شہزاد ابوظہبی سے آتا جاتا رہا ہے جسکی سفری تفصیلات بھی حاصل کرلی گئیں۔

نیشنل سائبر کرائم انویسٹیگیشن ایجنسی ملتان کے مطابق کروڑوں روپے مالیت کی قیمتی گاڑیاں اور دیگر اثاثے ضبط کرکے بیرون ملک سفر پر پابندی لگاتے ہوئے، تمام کے نام ایگزیٹ کنٹرول لسٹ میں شامل کر لیا گیا ہے جبکہ امریکن شہریوں اور مالیاتی اداروں کو لوٹنے والے نیٹ ورک سے منسلک گرفتار ملزمان کا سات روزہ جسمانی ریمانڈ منظورکر لیا گیا ہے۔

امریکن اور دیگر ممالک کے شہریوں اور بینکوں کو لوٹنے استعمال ہونے والی تمام فشنگ ویب سائٹس کو ٹریک کرلیا گیا ہے، گیمبلنگ اور گیمنگ کی آڑ میں فنانشل کرائم میں ملوث تمام ٹولز فرنزاک کے بعد قبضے میں لے لئے گئے ہیں۔