سیکیورٹی فورسز کی خیبر پختون خوا کے مختلف علاقوں میں تین آپریشنز میں مؤثر کارروائیوں کے دوران 15 خوارج مارے گئے، سیکیورٹی فورسز نے کرک، شمالی وزیرستان اور گومل زام میں انٹیلی جنس بیسڈ کارروائیاں کیں۔ شدید فائرنگ کے تبادلے کے دوران لانس نائیک عثمان مہمند اور سپاہی عمران خان بہادری سے لڑتے ہوئے شہید ہو گئے۔
پاک فوج کے شعبہ برائے تعلقاتِ عامہ (آئی ایس پی آر) کی جانب سے جاری بیان کے مطابق سیکیورٹی فورسز نے ضلع کرک میں خوارج کی موجودگی کی اطلاع پر انٹیلی جنس بیسڈ آپریشن کیا۔
آئی ایس پی کے مطابق آپریشن کے دوران سیکیورٹی اہلکاروں نے خوارج کے ٹھکانے کو مؤثر طریقے سے نشانہ بنایا، جس کے نتیجے میں 8 خوارج مارے گئے۔
آئی ایس پی آر کا کہنا ہے کہ سیکیورٹی فورسز کے شمالی وزیرستان میں ایک اور آپریشن میں 4 خوارج مارے گئے، تاہم شدید فائرنگ کے تبادلے کے دوران مٹی کے دو بہادر سپوت لانس نائیک عثمان مہمند اور سپاہی عمران خان بہادری سے لڑتے ہوئے شہید ہو گئے۔
آئی ایس پی آر کے مطابق جنوبی وزیرستان کےعلاقے گومل زائم میں سیکیورٹی اہلکاروں کی مؤثر کارروائی میں 3 خوارج مارے گئے، ہلاک ہونے والے خوارج کے قبضے سے اسلحہ اور گولہ بارود بھی برآمد ہوا۔ ہلاک خوارج دہشت گردی کی متعدد کارروائیوں میں ملوث تھے۔
آئی ایس پی آر کا کہنا ہے کہ علاقے میں پائے جانے والے کسی ممکنہ خارجی کو ختم کرنے کے لیے کلیئرنس آپریشنز بھی کیے گئے، سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور بہادر سپاہیوں کی یہ قربانیاں ہمارے عزم کو مزید مضبوط کرتی ہیں۔