تھائی لینڈ میں ایک حیرت انگیز اور دلچسپ واقعہ اس وقت پیش آیا جب ایک امریکی شارٹ ہئیر نسل کی بلی کو شہری نے ریسکیو کر کے پولیس اسٹیشن پہنچایا، مگر بلی نے وہاں پہنچ کر ایسی حرکتیں کیں کہ پولیس کو اسے گرفتار کرنا پڑ گیا۔
پولیس افسر دا پرندا پاکیسوک نے 9 مئی کو اس منفرد واقعے کی تفصیل ایک دلچسپ انداز میں شیئر کی۔ انہوں نے بتایا کہ بلی کو پیار سے تھانے میں خوش آمدید کہا گیا اور اس کا خیال رکھا گیا۔ بلی نے گلابی ہارنیس پہنا ہوا تھا اور بظاہر کافی معصوم لگ رہی تھی، لیکن کچھ ہی دیر میں اس نے اپنے پنجے دکھا دیے۔
بلی نے ایک کے بعد ایک کئی پولیس اہلکاروں کو نوچا اور کاٹا، جس سے تھانے کے ماحول میں ہلچل مچ گئی۔ افسر پاکیسوک نے مزاحیہ انداز میں کہا: ”اس بلی پر پولیس اہلکاروں پر حملے کا مقدمہ درج کیا جا رہا ہے اور اسے حراست میں لیا جا رہا ہے۔ براہِ کرم یہ پوسٹ شیئر کریں تاکہ اس کا مالک آ کر اس کی ضمانت کروا سکے۔“
یہ پوسٹ سوشل میڈیا پر جنگل کی آگ کی طرح پھیل گئی اور صارفین نے بلی کی شوخ مزاجی پر دلچسپ تبصرے کیے۔ کچھ صارفین نے اسے ”قاتلہ حسینہ“ قرار دیا تو کچھ نے لکھا کہ ”یہ بلی شاید خفیہ مشن پر تھی!“