نیول چیف ایڈمرل نوید اشرف نے نیوی وارکالج کے کانووکیشن سے خطاب میں کہا کہ پاک بھارت کشیدگی جنگ کی بدلتی نوعیت کا واضح ثبوت ہے، روایتی عسکری حکمت عملیوں میں تبدیلی کی ضرورت ہے۔ کانووکیشن کی تقریب میں 118 افسران کو ڈگریاں تفویض کی گئیں جن میں دوست ممالک کے 44 افسران بھی شامل تھے۔
پاک فوج کے شعبہ برائے تعلقاتِ عامہ (آئی ایس پی آر) کے مطابق پاکستان نیوی وار کالج کے 54 ویں کانووکیشن کی تقریب کا لاہور میں انعقاد ہوا۔ چیف آف دی نیول اسٹاف ایڈمرل نوید اشرف تقریب کے مہمان خصوصی تھے۔
آئی ایس پی آر کی جانب سے جاری بیان کے مطابق تقریب میں 118 افسران کو ڈگریاں تفویض کی گئیں
فارغ التحصیل افسران میں دوست ممالک کے 44 افسران بھی شامل تھے۔
نیول چیف ایڈمرل نوید اشرف نے خطاب میں نئے خطرات کو سمجھنے کی ضرورت پر زور دیتے ہوئے کہا کہ پاک بھارت حالیہ کشیدگی جنگ کی بدلتی ہوئی نوعیت کا واضح ثبوت ہے، غیر ریاستی عناصر کے کردار میں روایتی عسکری حکمت عملیوں میں تبدیلی کی ضرورت ہے۔
آئی ایس پی آر کے مطابق تقریب کے اختتام پر مہمان خصوصی نے کامیاب گریجویٹس میں ڈگریاں تقسیم کیں۔ تقریب میں اعلیٰ عسکری حکام ، سول معززین اور اہلخانہ شریک تھے۔