پاکستان اسٹاک ایکسچینج میں آج کاروباری دن کے آغاز پر ملا جلا رجحان دیکھنے میں آیا۔ کاروبار کے دوران 100 انڈیکس میں 150 پوائنٹس کی کمی ریکارڈ کی گئی، جس کے بعد انڈیکس 1 لاکھ 18 ہزار 900 پوائنٹس کی سطح پر آگیا۔
مارکیٹ میں اتار چڑھاؤ کے باوجود سرمایہ کار محتاط رویہ اپنائے ہوئے نظر آئے، جبکہ بعض سیکٹرز میں معمولی بہتری بھی دیکھی گئی۔
دوسری جانب انٹربینک مارکیٹ میں ڈالر کی قیمت میں معمولی کمی ریکارڈ کی گئی۔ اسٹیٹ بینک کے مطابق انٹربینک میں امریکی ڈالر 31 پیسے سستا ہو کر 281.75 روپے پر آ گیا۔
ماہرین کے مطابق ڈالر کی قیمت میں کمی کرنٹ اکاؤنٹ خسارے میں بہتری اور ترسیلات زر میں اضافے کا نتیجہ ہو سکتی ہے، تاہم آئندہ دنوں میں مارکیٹ کا رجحان حکومتی مالیاتی پالیسیوں اور آئی ایم ایف کے ساتھ مذاکرات پر منحصر ہوگا۔