خیبر پختونخوا میں سیکیورٹی فورسز کی 3 مختلف کارروائیوں کے دوران بھارتی حمایت یافتہ 9 دہشت گرد ہلاک ہوگئے، یہ کارروائیں ڈیرہ اسماعیل خان، ٹانک اور خیبر کے اضلاع میں کی گئیں۔
پاک فوج کے شعبہ تعلقات عامہ (آئی ایس پی آر) کے مطابق 24 اور 25 مئی کو خیبر پختونخوا میں سیکیورٹی فورسز کی جانب سے 3 مختلف کارروائیوں کے دوران مجموعی طور پر 9 بھارتی اسپانسرڈ دہشت گردوں کو ہلاک کردیا گیا۔
آئی ایس پی آر کے مطابق سیکیورٹی فورسز نے ڈیرہ اسماعیل خان میں انٹیلی جنس بنیادوں پر آپریشن کیا، یہ آپریشن بھارتی اسپانسرڈ دہشت گردوں کی موجودگی کی اطلاع پر کیا گیا، آپریشن کے دوران سیکیورٹی فورسز نے مؤثر کارروائی کرتے ہوئے شدید فائرنگ کے تبادلے کے بعد 4 بھارتی اسپانسرڈ دہشت گردوں کو جہنم واصل کردیا۔
آئی ایس پی آر نے بتایا کہ سیکیورٹی فورسز کی جانب سے ٹانک میں دوسرا انٹیلی جنس بنیادوں پر آپریشن کیا گیا، جس میں فائرنگ کے تبادلے میں 2 بھارتی اسپانسرڈ خوارج مارے گئے۔
اسی طرح تیسرے واقعے میں ضلع خیبر کے علاقہ باغ میں سیکیورٹی فورسز نے فتنہ الخوارج کے 3 خوارجیوں کو ہلاک کردیا۔
آئی ایس پی آر کے مطابق تمام ہلاک بھارتی اسپانسرڈ خوارجیوں سے بڑی تعداد میں اسلحہ اور گولہ بارود بھی برآمد ہوا، ہلاک خوارج دہشت گردی کی مختلف کاروائیوں میں ملوث تھے۔
ترجمان پاک فوج کا کہنا ہے کہ سیکیورٹی فورسز کی جانب سے علاقے میں خوارج کے مکمل خاتمے کے لیے سرچ آپریشنز کیا گیا اور سیکیورٹی فورسز ملک سے بھارتی سرپرستی میں ہونے والی دہشت گردی کے خاتمے کے لیے پر عزم ہیں۔
دہشت گرد عناصر کے خاتمے کیلئے ہمارا عزم غیر متزلزل رہے گا، صدر مملکت
صدر مملکت آصف علی زرداری نے خیبرپختونخوا میں 9 خوارج جہنم واصل کرنے پر سیکیورٹی فورسز کو خراج تحسین پیش کیا۔
صدر آصف زرداری نے دہشت گردوں کا قلع قمع کرنے پر سیکیورٹی فورسز کی بہادری کو سراہا۔
انہوں نے کہا کہ دہشت گردوں کے مکمل خاتمے تک کاروائیاں جاری رہیں گی، سیکیورٹی فورسز کا بھارتی حمایت یافتہ دہشت گردوں کے خاتمے کے لیے کارروائیاں خوش آئند ہیں، دہشت گرد عناصر کے خاتمے کے لیے ہمارا عزم غیر متزلزل رہے گا۔
صدر مملکت آصف علی زرداری نے فتنۃ الخوارج کے مکمل خاتمے کے قومی عزم کا اظہار بھی کیا۔