خیبر پختونخوا میں مبینہ کرپشن کے خلاف پیپلز پارٹی نے پشاور میں اسمبلی چوک پر احتجاج کیا، مظاہرین کو ریڈ زون میں جانے سے روکنے کے لیے پولیس نے شیلنگ کی، مظاہرین نے تحریک انصاف کے احتجاجی کیمپ کو آگ لگا دی۔
پشاور میں پاکستان پیپلز پارٹی صوبے میں مبینہ کرپشن کے خلاف اسمبلی چوک پر احتجاج کیا، جس میں مرکزی سیکریٹری جنرل ہمایوں خان، صوبائی صدر محمد علی شاہ باچا اور دیگر رہنما شریک تھے۔
پشاور میں اسمبلی چوک پر پیپلزپارٹی کے احتجاجی مظاہرے پر پولیس کی جانب سے آنسو گیس کی شیلنگ کی گئی جس سے مظاہرین مشتعل ہوگئے اور انہوں نے پی ٹی آئی کے احتجاجی کیمپ کو آگ لگادی۔
پاکستان پیپلزپارٹی کی جانب سے صوبہ بچاؤ مہم کے سلسلے میں پشاور کے اسمبلی چوک میں احتجاجی ریلی میں پارٹی کے مرکزی سیکریٹری جنرل ہمایوں خان کی تقریر کے دوران پولیس نے آنسو گیس شیلنگ کردی۔
پولیس کی شیلنگ سے مظاہرین منتشر ہوگئے تاہم پیپلز پارٹی کے کارکنان نے وہاں پر قائم تحریک انصاف کے احتجاجی کیمپ کو آگ لگادی، کیمپ عمران خان کی رہائی کے لیے لگایا گیا تھا۔
پولیس نے مظاہرین کو خیبر روڈ پر ریڈ زون میں داخل ہونے سے روکنے کےلیے آنسو گیس کی شیلنگ کی، احتجاج کے باعث خیبر روڈ ہر قسم کی ٹریفک کے لیے بند کردیا گیا۔
پولیس کی شیلنگ سے منتشر ہونے والے مظاہرین دوبارہ جمع ہونا شروع ہوگئے، شیلنگ سے متعدد مظاہرین بے حال ہوگئے، اسمبلی چوک میں مظاہرین نے تحریک انصاف کے احتجاجی کیمپ کو آگ لگا دی، احتجاجی کیمپ بانی پی ٹی آئی کی رہائی کے لیے لگایا گیا تھا، خیبر پختونخوا اسمبلی کے باہر پولیس کی بھاری نفری تعینات ہے۔
پیپلزپارٹی خیبرپختونخوا کے صدر محمد علی شاہ باچا نے ریلی سے خطاب کرتے ہوئے کہا کہ صوبے میں کرپشن کا بازار گرم ہے، نوکریاں فروخت ہو رہی ہے۔
ان کا کہنا تھا کہ کرپٹ وزیر اعلیٰ اور کرپٹ حکومت کو پیغام دیتا ہوں، آئندہ احتجاج میں وزیراعلیٰ ہاؤس پر چڑھائی ہوگی، آج پیپلزپارٹی کے کارکنوں نے کرکے دکھایا، وزیراعلی سن لیں کہ اب پی پی پی کارکنان بیدار ہوچکے ہیں۔
انہوں نے کہا کہ صوبہ بچاؤ مہم تب تک جاری رہے گا جب تک حکومت کا خاتمہ نہیں ہوگا، عید کے بعد وزیر اعلی ہاؤس پر چڑھائی کریں گے۔
بلاول بھٹو زرداری کی پشاور میں پی پی پی ریلی پر حملے کی مذمت
پیپلزپارٹی کے چیئرمین بلاول بھٹو زرداری نے پشاور میں پی پی پی ریلی پر حملے کی مذمت کرتے ہوئے کہا ہے کہ صوبائی حکومت نے کرپشن کو چھپانے کی ناکام کوشش کی ہے۔
بلاول بھٹو نے کہا ہے کہ خیبرپختونخوا میں لاقانونیت اور بیروزگاری کے خلاف احتجاج ہوا، پرامن سیاسی کارکنوں پر آنسوگیس کی شیلنگ قابل افسوس ہے۔
انہوں نے کہا ہم اوچھے ہتھکنڈوں سے ڈرنے والے نہیں، کے پی کے کی نااہل صوبائی حکومت کا تعاقب جاری رکھیں گے، نہتے سیاسی کارکنوں پر تشدد بزدلی کا ثبوت ہے۔
بلاول بھٹو نے کہا کہ صوبہ بچاؤ تحریک آج خیبر پختونخوا کےہر شہری کی آواز ہے، ہم لاٹھیوں اور ڈنڈوں سے ڈرنے والے نہیں ہیں۔
ان کا مزید کہنا تھا کہ خیبرپختونخوا کی کرپٹ حکومت کا سامنا کرنے کو تیار ہیں، پی ٹی آئی کا فاشسٹ چہرہ آج خیبرپختونخوا کے عوام نے دیکھ لیا۔