برطانوی شہر لیورپول کے سٹی سینٹر میں پریمیئر لیگ ٹائٹل جیتنے کی خوشی میں منعقدہ جشن کے دوران ایک ڈرائیور نے گاڑی ہجوم پر چڑھا دی جس میں کم از کم 50 افراد زخمی ہو گئے، جن میں سے 27 کو اسپتال منتقل کر دیا گیا ہے۔
پولیس کے مطابق 53 سالہ برطانوی ڈرائیور کو موقع پر ہی گرفتار کر لیا گیا ہے اور ابتدائی تفتیش کے مطابق یہ واقعہ دہشت گردی سے متعلق نہیں ہے۔
ایمبولینس حکام کے مطابق کم از کم 20 افراد کو جائے وقوعہ پر ابتدائی طبی امداد دی گئی، جبکہ 27 افراد کو قریبی اسپتالوں میں منتقل کیا گیا، جن میں چار بچے بھی شامل ہیں۔ خبر رساں ادارے رائٹرز کے مطابق ایک بچہ اور ایک نوجوان شدید زخمی ہیں۔
سوشل میڈیا پر سامنے آنے والی ویڈیوز میں ایک گاڑی کو تیزی سے ہجوم کی جانب بڑھتے ہوئے دیکھا جا سکتا ہے۔
عینی شاہدین کے مطابق، گاڑی نے ابتدائی طور پر کچھ افراد کو ٹکر مارنے کے بعد رکنے کی کوشش کی، لیکن مشتعل افراد گاڑی کی طرف لپکے اور اس کے شیشے توڑ دیے۔ اس کے باوجود ڈرائیور گاڑی چلاتا رہا اور مزید کئی افراد کو زخمی کر دیا۔
جب گاڑی آخرکار رکی، تو مشتعل مداحوں نے اسے گھیر لیا اور دوبارہ شیشے توڑنے کی کوشش کی، تاہم پولیس نے بروقت مداخلت کر کے صورتحال پر قابو پایا اور ڈرائیور کو مشتعل ہجوم سے محفوظ رکھا۔
مرسی سائیڈ پولیس نے بتایا کہ واقعہ اس وقت پیش آیا جب لیورپول کی ٹیم کھلاڑیوں اور کوچنگ اسٹاف کے ساتھ ایک اوپن ٹاپ بس پر شہر کے مرکز میں فتح کا جشن منا رہی تھی، اور لاکھوں مداح سڑکوں پر موجود تھے۔
برطانوی وزیر اعظم کیئر اسٹارمر نے اس واقعے کو ”خوفناک“ قرار دیا اور کہا کہ وہ مسلسل صورتحال پر نظر رکھے ہوئے ہیں۔ سوشل میڈیا پر اپنے بیان میں انہوں نے کہا کہ لیورپول کے مناظر خوفناک ہیں، میری ہمدردیاں تمام زخمیوں اور متاثرین کے ساتھ ہیں۔ میں پولیس اور ایمرجنسی سروسز کا اس ہنگامی صورتحال میں فوری ردعمل پر شکریہ ادا کرتا ہوں۔
پولیس نے مزید کہا ہے کہ واقعے کی مکمل تحقیقات جاری ہیں تاکہ اس المناک حادثے کے پس منظر کو واضح کیا جا سکے۔