پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری کی قیادت میں ایک اعلیٰ سطحی سفارتی وفد واشنگٹن اور نیویارک کے کامیاب دورے کے بعد لندن پہنچ گیا ہے۔ وفد کا مقصد پاکستان کے مؤقف کو عالمی سطح پر مؤثر انداز میں اجاگر کرنا اور بین الاقوامی برادری کو درپیش علاقائی چیلنجز سے آگاہ کرنا ہے۔
وفد برطانیہ میں پارلیمنٹ کی سینئر قیادت سے ملاقاتیں کرے گا جبکہ جموں و کشمیر پر آل پارٹیز پارلیمانی گروپ کے ساتھ بھی اہم مشاورتی نشستیں طے ہیں۔ ان ملاقاتوں میں مسئلہ کشمیر، علاقائی سلامتی، اور انسانی حقوق کی صورتحال پر گفتگو متوقع ہے۔
وفد معروف تھنک ٹینکس اور عالمی میڈیا سے بھی رابطے کرے گا، جس میں پاکستان کی خطے میں امن و استحکام کے لیے جاری کوششوں کو اجاگر کیا جائے گا۔ اس موقع پر بھارتی حکومت کے جارحانہ اقدامات اور ان کے منفی اثرات پر بھی عالمی برادری کو آگاہ کیا جائے گا۔
مزید برآں وفد عالمی برادری سے مطالبہ کرے گا کہ وہ جنوبی ایشیا میں پائیدار امن کے فروغ میں مؤثر کردار ادا کرے۔ سندھ طاس معاہدے کی روایتی کارروائی کی بحالی کا معاملہ بھی وفد کے ایجنڈے میں شامل ہے، جو اس بات کی اہمیت کو اجاگر کرتا ہے کہ آبی وسائل کے پرامن اور منصفانہ استعمال کے لیے بین الاقوامی اصولوں پر عمل ضروری ہے۔