اسلام آباد ٹریفک پولیس کی خصوصی انفورسمنٹ مہم اور کارکردگی رپورٹ جاری کر دی گئی ہے جس میں ایک ہفتے کے دوران قوانین کی سنگین خلاف ورزیوں پر بھرپور کارروائی کی گئی۔ مہم کے دوران 112 مقدمات کا اندراج کیا گیا جبکہ 1,119 موٹر سائیکلیں اور 412 گاڑیاں تھانوں میں منتقل کی گئیں۔
ترجمان پولیس کے مطابق دورانِ ڈرائیونگ قوانین کو نظر انداز کرنے والوں کے خلاف سخت کارروائی کی گئی، اور پہلی بار ڈرون ٹیکنالوجی کی مدد سے مختلف خلاف ورزیوں پر 48 ڈرائیورز کو جرمانے عائد کیے گئے۔
رپورٹ کے مطابق لین کی خلاف ورزی پر 845، بغیر لائسنس کے گاڑی چلانے پر 76، ٹرپل سواری پر 11، اور 23 کم عمر ڈرائیورز پر بھاری جرمانے عائد کیے گئے۔
اس کے علاوہ مخالف سمت میں ڈرائیونگ کرنے پر 923، بغیر ہیلمٹ موٹر سائیکل چلانے پر 1,007 اور غیر قانونی پارکنگ پر 2,766 چالان کیے گئے۔
چیف ٹریفک آفیسر کیپٹن (ر) سید ذیشان حیدر نے کہا ہے کہ مہم کے دوران بلا تفریق کارروائیاں جاری رکھی جائیں گی۔ اُن کا کہنا تھا کہ شہریوں کی جان و مال کے تحفظ کے لیے ٹریفک قوانین کی خلاف ورزی پر زیرو ٹالرینس پالیسی اپنائی گئی ہے۔
انہوں نے مزید کہا کہ ٹریفک نظم و ضبط یقینی بنانے کے لیے جدید ٹیکنالوجی اور مؤثر نفاذ کے ذریعے کارروائیاں جاری رکھی جائیں گی۔